मुंबई : दक्षिण आफ्रिकेचा संघ ५ सामन्यांच्या टी-२० मालिकेसाठी भारत दौऱ्यावर आला आहे. भारत आणि आफ्रिका यांच्यातील मालिका ९ जूनपासून सुरू होणार आहे. ही मालिका सुरू होण्यापूर्वी दक्षिण आफ्रिका टी-२० संघाचा कर्णधार टेंबा बावुमाने सांगितले की, भारताविरुद्धची ही मालिका त्याच्यासाठी किती महत्त्वाची आहे. टेम्बाचा असा विश्वास आहे की या मालिकेद्वारे त्यांना २०२२ च्या टी-२० विश्वचषक स्पर्धेसाठी संघ बनवण्यास मदत होईल.
टेंबा बावुमा याने आभासी पत्रकार परिषदेत सांगितले की, ‘भारतातील परिस्थिती पूर्णपणे ऑस्ट्रेलियासारखी नाही. पण तरीही भारतात क्रिकेट खेळल्याचा नक्कीच फायदा होईल. कोणत्याही प्रकारचे स्पर्धात्मक क्रिकेट आमच्यासाठी चांगले असणार आहे.’ बावुमा म्हणाला की. ‘आम्ही या सामन्यांचा उपयोग खेळाडूंच्या निवडीसाठी करणार आहोत. त्यामुळे खेळाडूना संघातील भूमिका काय आहे हे त्यांना चांगलेच माहीत आहे. दक्षिण आफ्रिकेचा संघ सलामीवीर क्विंटन डी कॉकसह आणखी एका तगड्या सलामीवीराच्या शोधात आहे. त्यामुळे भारताविरुध्द काही नवीन चेहऱ्यांना संधी दिली जाऊ शकते.’
तो म्हणाला की, ‘आम्ही काही नवीन चेहऱ्यांचा टी-२० मध्ये समावेश केला आहे. त्या खेळाडूंना ते काय भूमिका बजावू शकतात आणि ते संघासाठी कसे योगदान देऊ शकतात हे पाहण्याची संधी दिली जाईल. भारतीय संघात फारसे वरिष्ठ खेळाडू नसतील पण ही मालिका खूप स्पर्धात्मक असेल अशी अपेक्षा बावुमाने व्यक्त केली. या मालिकेसाठी भारताचा कर्णधार रोहित शर्मा, विराट कोहली आणि जसप्रीत बुमराह यांना विश्रांती देण्यात आली असून, संघाचे नेतृत्व केएल राहुलकडे देण्यात आले आहे. तर उमरान मलिक आणि अर्शदीप सिंग यांच्यासह काही नवोदित खेळाडू संघात सहभागी केले आहेत.
बावुमा म्हणाला की, ‘हा नक्कीच एक नवीन लूक असलेला भारतीय संघ आहे. नुकत्याच पार पडलेल्या इंडियन प्रीमियर लीगमध्ये अनेक खेळाडूंनी चांगली कामगिरी केली असून त्यांना संधी देण्यात आली आहे. पण आपल्या दृष्टिकोनातून आपण याकडे वेगळ्या नजरेने पाहत नाही. तो म्हणाला की, आम्ही भारताची बी टीम म्हणून याकडे पाहत नाही. आम्ही भारतीय टी-२० संघाविरुद्ध खेळलो आहोत. त्यामुळे आमचा संघ स्फूर्तीने परिपूर्ण असेल आणि स्पर्धेची कमतरता भासू देणार नाही.’
महत्वाच्या बातम्या:
