Raj Thackeray | “दीदी जिथे असतील तिथे…”, लता मंगेशकरांच्या जयंती निमीत्त राज ठाकरेंची भावूक पोस्ट

🕒 1 min read

मुंबई : मनसे अध्यक्ष राज ठाकरे आणि गाणसम्राज्ञी तसेच भारतरत्न लता मंगेशकर यांचे कौटुंबिक संबंध होते. अशातच लता मंगेशकर यांची आज 93 वी जयंती आहे. यानिमित्त राज ठाकरे यांनी भावूक फेसबुक पोस्ट शेअर केली आहे. या पोस्टमध्ये त्यांनी लतादीदींसोबतच्या आठवणी शेअर केल्या आहेत.

राज ठाकरे यांची भावूक फेसबुक पोस्टः

लतादीदींची आज जयंती. आपल्याला वाढदिवसाच्या मिळणाऱ्या शुभेच्छांचा आनंद असतोच, पण आपल्याला एखाद्या व्यक्तीला वाढदिवसाच्या शुभेच्छा देण्यात पण विशेष आनंद असतो, त्या व्यक्तींमध्ये दीदी होत्या. त्यांना थेट शुभेच्छा देण्याचा आनंद मला दोन दशकांहून अधिक काळ मिळाला, हे माझं भाग्यच असल्याचं राज ठाकरेंनी त्यांच्या पोस्टमध्ये लिहिलं आहे.

दीदी गेल्यापासून मी त्यांच्याबद्दल फारसं कुठेच बोललो नाही, सार्वजनिक व्यासपीठावर तर नाहीच नाही. दीदींच्या निधनानंतर एक रितेपण जाणवायला लागलं, आणि ह्या रितेपणाच्या तीव्रतेचा अंदाज येण्यातच मधले काही महिने निघून गेले, असं देखील राज ठाकरे म्हणाले.

यादरम्यान, दीदीबद्दल काही लिहायचं ठरवलं तर, त्यांच्या गाण्याबद्दल लिहिणं शक्यच नाही, ते इतकं अत्युच्च आहे की कितीही त्याला शब्दांत पकडायचं ठरवलं तरी हातातून काहीतरी निसटतच राहतंय असं वाटत राहणार. पण त्यांचं गाणं जसं दैवी होतं, तसाच त्यांच्या व्यक्तिमत्वात एक दैवी अंश होता आणि ज्याची भुरळ मला त्यांना पहिल्यांदा भेटलो तेंव्हा पडली आणि ती कायम राहिली आणि पुढेही राहील. हल्ली ‘ब्रँड’ हा शब्द प्रचलित आहे, किंवा राजकीय,सामाजिक जीवनात ‘करिष्मा’ हा शब्द वापरतात, हे निर्माण करण्यासाठी प्रचंड अट्टाहास केला जातो, असं राज ठाकरेंनी त्यांच्या पोस्टमध्ये लिहिलं आहे.

अशा अट्टाहासातून, ‘ब्रँड’, ‘करिष्मा’ काहीकाळ निर्माण होतो पण तो ओसरतो, निसटून जातो. पण दीदींच्या बाबतीत ते नैसर्गिकपणे आणि सहज घडत गेलं आणि आणि ती घडण्याची प्रक्रिया आणि त्याचं अंतिम टोक ह्या दोन्हींबद्दल दीदी अनभिज्ञ आणि अलिप्त राहिल्या, हे दुर्मिळ असून आयुष्यात फक्त आणि फक्त गाणं ह्या एका गोष्टीवर कमालीचं प्रेम करत, ते आत खोल रुजवत पुढे ते लोकांसमोर ठेवायचं. ते गाणं वरवर सोपं वाटावं पण ते तितकंच कोणालाच पूर्ण गवसू नये इतकं मोठं, अशी साधना केल्यावर जी शांतता, सहजता दीदींच्या वागण्यात आली होती, तिचं वर्णन करायला ऋषितुल्य हाच शब्द मलातरी सुचतोय, असं राज म्हणाले.

दरम्यान, राज ठाकरे यांनी पोस्टमध्ये म्हटल्याप्रमाणे, हे असलं सगळं दैवी असतं, ते कधीतरी एकदाच येतं. हे भव्य आणि तरीही अमूर्त वाटणारं ‘दर्शन’ मला अनेकदा जवळून होऊन गेलं. आयुष्यात सर्वोच्च काय असतं हे पाहणं आणि ते अनुभवणं हे भाग्य मला लाभलं हाच माझ्या आयुष्यातील खूप मोठा आनंद.

दीदी जिथे असतील तिथे त्यांना माझा नमस्कार, असा राज ठाकरे यांच्या पोस्टचा भावूक अंत करण्यात आला आहे.

महत्वाच्या बातम्या :

• Bacchu Kadu | बच्चू कडूंना राग अनावर! ‘ऐकून घे आधी’, म्हणत स्थानिकाच्या लगावली कानशिलात
• Eknath Shinde | एकनाथ शिंदेंच्या दसरा मेळाव्याला नरेंद्र मोदी अन् अमित शहांची लागणार उपस्थिती?
• Mahesh Babu | दाक्षिणात्य सुपरस्टार महेश बाबूवर दुःखाचा डोंगर!
• Eknath Shinde | भारतात PFI वर बंदी! एकनाथ शिंदेंनी दिली प्रतिक्रिया, म्हणाले…
• Eknath Shinde | शिवभोजन थाळी बंद करण्याचा निर्णय अद्याप नाही – एकनाथ शिंदे