🕒 1 min read
औरंगाबाद : वाळूज महानगरातील बजाजनगर येथील आरएच-१२३ येथील जय बजरंग हौसिंग सोसायटीत राहणाऱ्या अनुसया आत्माराम जाधव (९७) या महिलेला भरधाव ट्रकने दिलेल्या धडकेत महिला ट्रकच्या मागील चाकाखाली सापडून जागीच ठार झाल्याची घटना २९ जानेवारी रोजी सकाळी १० वाजेच्या सुमारास बीएसएनएल गोडाऊन ते दक्षिणमुखी हनुमान मंदिर मार्गावर घडली. विशेष म्हणजे ट्रकच्या मागील चाकाखाली आलेल्या महिलेला ट्रकने तब्बल १५ ते २० फूट लांब फरफटत नेले त्यानंतर नागरिकांनी आरडाओरडा केल्याने ट्रकचालक मदत न जरताच ट्रक सोडून घटनास्थळावरून पसार झाला.
याबाबत अधिक माहिती अशी की, ९७ वर्षीय अनुसया ही वृध्द महिला नित्यनेमाने दररोज सकाळी घरालगत असणाऱ्या हनुमान मंदिरात दर्शनासाठी जातात. २९ जानेवारी रोजीसुद्धा सकाळचा नाश्ता आटोपून त्या देवदर्शनासाठी सकाळी १० च्या सुमारास घराबाहेर पडल्या घरापासून शंभर मीटर अंतरावर अंतर्गत मुख्य रस्तावर जाताच पाठीमागून आलेल्या ट्रकने (एमएच ०९, एजी ६६६९) महिलेला धक्का दिल्याने महिला ट्रकच्या मागील चाकाखाली सापडली. एकाला लागूनच असणाऱ्या दोन टायरच्या गॅपमध्ये महिला सापडल्याने पुढे दूरवर ट्रकसह महिला फरफटत गेली. याच वेळी परिसरातील नागरिकांनी एकच आरडाओरड केल्याने चालकाने काही अंतरावर ट्रक उभा केला. मात्र, नागरिक चोप देतील या भीतीने मदत न करताच चालक घटनास्थळावरून ट्रक सोडून पसार झाला.
घटनेची माहिती मिळताच पोलीस उपनिरीक्षक प्रशांत गंभीरराव, सहाय्यक फौजदार सोनाजी बुट्टे, आरडी वडगावकर यांच्यासह वाहतूक शाखेचे पोलीस हेड कॉन्स्टेबल दत्ता गवळी, रामेश्वर कवडे तसेच पोलीस मित्र मनोज जैन यांनी घटनास्थळी धाव घेऊन मृत महिलेला पोलीस वाहनातून घाटीत रवाना केले. तसेच घटनास्थळी असलेला ट्रक वाळूज एमआयडीसी पोलिस ठाण्यात घेऊन गेले.
महत्वाच्या बातम्या –
- ‘समान गुण असूनही प्रवेश मिळण्यास अडचण’, साष्टपिंपळगावच्या विद्यार्थ्यांची खंत
- ‘महाराष्ट्र देशा’ थेट साष्टपिंपळगावात, मराठा आरक्षण आंदोलनाच्या ठिणगीचे मशालीत रुपांतर
- खळबळजनक! खा.जलील 100 कोटींहून अधिकचा घोटाळा उघडकीस आणणार
- मुंबईकरांवर लोकल प्रवासासाठी वेळेचं बंधन; मनसेची खोचक टीका
- धनश्री काडगावकरच्या घरी चिमुकल्याचे आगमन
