स्मार्ट सीईओचा पदभार घेताच मनोहरे ‘क्वारन्टाइन’, वादाचा नवा अंक सुरू?

🕒 1 min read

औरंगाबाद : नगर विकास विभागाने १ फेब्रुवारी रोजी स्मार्ट सिटीच्या सीईओ पदावर बाबासाहेब मनोहरे यांची नियुक्ती केली होती. त्यानुसार नगरविकास मंत्रालयाकडून मिळालेल्या तातडीच्या सूचनांनुसार त्यांनी २२ फेब्रुवारी रोजी स्मार्ट सिटी सीईओ पदाचा कार्यभार स्विकारुन कामकाजास सुरुवात केली. स्मार्ट सिटीच्या बांधकामाची पाहणी करत त्यांनी कामाचा श्रीगणेशा केला खरा मात्र त्यानंतर तीनच दिवसात ते रजेवर गेल्याची माहिती मिळत आहे. पदभार स्विकारताच मनोहरे क्वारन्टाईन झाल्यामुळे स्मार्ट सिटीच्या वादाचा हा नवा अंक तर नाही ना? अशी चर्चा दबक्या आवाजात सुरु आहे.

महापालिकेचे आयुक्त आस्तिक कुमार पांडेय स्मार्ट सिटी डेव्हलपमेंट कॉर्पोरेशनचे काम पाहत असतांना राज्य शासनाने स्मार्ट सिटीच्या सीईओ पदावर मुख्याधिकारी संवर्गातील बाबासाहेब मनोहरे यांची नियुक्ती केली. मात्र या नियुक्तीवर आयुक्त पांडेय यांच्यासह सर्वच शिवसेना पदाधिकाऱ्यांनी आक्षेप घेतला होता. स्मार्ट सिटीच्या रखडलेल्या कामांनी पांडेय यांच्या काळात वेग धरला होता. अनेक अडथळे दूर करून मनपा प्रशासकांनी कामे सुरू केली होती. मात्र मनोहरेंच्या येण्याची धास्ती घेत अनेकांनी साम-दाम-दंडभेदाचा वापर करत हि नियुक्ती रद्द करण्याचा प्रयत्न केला. मात्र मनोहरे अखेर रुजू झालेच.

बाबासाहेब मनोहरे रुजू झाले त्यादिवशी पांडेय यांनी त्यांना औपचारिकरित्या पदभार देणे आवश्यक होते. मात्र तब्येतीचे कारण पुढे करत त्यांनी त्यादिवशी रजेवर जाणे पसंद केले. पांडेय आणि मनोहरे यांची समोरासमोर भेट आजपर्यंत झालेली नसल्याचे सूत्रांनी सांगितले. रुजू झाल्यानंतर मनोहरे यांनी कामास सुरुवात केली मात्र चौथ्याच दिवशी २६ फेब्रुवारी रोजी ते रजेवर गेले आहेत.

मी क्वारन्टाईन झालो आहे, अशी माहिती मनोहरेंनी ‘महाराष्ट्र देशा’शी बोलतांना दिली. मात्र कामाला सुरुवात केल्यानंतर अचानकच क्वारन्टाईन होण्यामागचे कारण मनपा प्रशासक तसेच शहरातील शिवसेनेचे नेते तर नव्हे ना? असा सवाल अनेकांकडून उपस्थित होत आहे.

महत्त्वाच्या बातम्या 

• मुख्यमंत्री ठाकरेंकडून प्रशासकपदी ‘पांडेय’ यांना पुन्हा मुदतवाढ
• ‘एक फडणवीस क्या करेगा ? तुम्हारे दादा को धो ढालेगा’
• त्यादिवशी मुंबई अंधारात गेली, तो घातपातच होता : ऊर्जामंत्र्यांचा दावा
• जेष्ठांच्या रांगेत माजी महापौर आणि नगरसेवक
• अजित पवार आणि ठाकरे सरकारला विदर्भ-मराठवाड्यातील लोकांबद्दल आकस आहे का ?