Ajit Pawar | राष्ट्रवादीतही भूकंप होणार? अजित पवारांच्या भूमिकेमुळे शरद पवार तणावात!

🕒 1 min read

महाराष्ट्राच्या राजकारणाचे भीष्म पितामह म्हटल्या जाणाऱ्या शरद पवारांचे दावे थक्क करणारे असतात. त्यांचे अंदाज देखील अचुक असतात. पण आता महाविकास आघाडी सरकार पडल्यापासून राष्ट्रवादी काँग्रेस पार्टी बॅकफुटवर गेली आहे. काही काळापासून शरद पवार स्वतःच अडचणीत सापडले आहेत. काही महिन्यांपूर्वी त्यांच्या प्रयत्नातून स्थापन झालेले महाविकास आघाडीचे सरकार एकनाथ शिंदे यांच्या बंडामुळे पडले. त्यामुळे बंड जरी शिवसेनेत झाला असल्या तरी त्याचे चांगलेच झटके राष्ट्रवादीला बसले. त्यामुळे शरद पवारांना त्यांच्या राजकीय कारकिर्दीतील सर्वात मोठ्या संकटाचा सामना करावा लागत आहे का, असा प्रश्न निर्माण झाला आहे. रविवारी दिल्लीत झालेल्या राष्ट्रवादी काँग्रेसच्या राष्ट्रीय कार्यकारिणीच्या बैठकीतून अजित पवार निघून गेले. त्यामुळे ते नाराज असल्याची जोरदार चर्चा आहे. वक्ता म्हणून जयंत पाटील यांच्या नावाची घोषणा होताच अजित पवार मंचावरून निघून गेले. आता नाराजी नसल्याचे त्यांनी स्पष्ट केले असले तरी यापूर्वी अजित पवारांनी बंडखोर वृत्ती दाखवली आहे.

जयंत पाटील यांच्यानंतर अजित पवार बोलणार होते, मात्र ते परतले नाहीत. अशातच व्यासपीठावर शरद पवार यांच्या उपस्थितीत अजित पवारांची ही भूमिका मोठे आव्हान म्हणून पाहिली जात आहे. त्यामुळे पक्षात फूट पडण्याचीही चर्चा सुरू झाली आहे. त्याचा प्रत्यय रविवारी उघडपणे दिसून आला. शरद पवारांच्या समारोपाच्या भाषणापूर्वी अजित पवार भाषण करतील, असे पक्षाचे खासदार प्रफुल्ल पटेल यांनी सांगितले होते. पण तो स्टेजवरून अशा रीतीने उठले की परत आलेचं नाहीत. अजित पवार वॉशरूममध्ये असल्याचे मंचावरूनच सांगण्यात आले. मात्र उशिरापर्यंत ते आले नाहीत आणि ते परतले तेव्हाही शरद पवार यांचे समारोपाचे भाषण सुरू होते.

अजित पवार यांची भूमिका राष्ट्रवादीला तणावात टाकणारी-

अजित पवार मंचावरून उठताच त्यांच्या समर्थकांनीही घोषणाबाजी केली. त्यांच्या या भूमिकेकडे शक्तीप्रदर्शन म्हणून पाहिले जात आहे. नाराज अजित पवारांचे मन वळवण्याची जबाबदारी पुन्हा एकदा त्यांच्या चुलत बहिण सुप्रिया सुळे यांच्यावर देण्यात आल्याचे बोलले जात आहे. अजित पवारांची ही भूमिका राष्ट्रवादीला तणावात टाकणारी आहे, कारण त्यांनी यापूर्वी बंडखोरी करून देवेंद्र फडणवीस यांच्यासोबत शपथही घेतली आहे. दोघांनीही सकाळीच मुख्यमंत्री आणि उपमुख्यमंत्रीपदाची शपथ घेतली होती, पण 80 तासही सरकार चालू शकले नाही. आजही त्यांचे फडणवीस यांच्याशी चांगले संबंध असल्याचे बोलले जाते.

अजित पवार यांनी बंडखोर वृत्ती दाखवली तर…

शनिवारीच शरद पवार यांची पुढील ४ वर्षांसाठी पक्षाच्या राष्ट्रीय अध्यक्षपदी पुन्हा एकदा निवड झाली आहे. 1999 पासून ते पक्षाचे अध्यक्ष आहेत. सध्या त्यांच्याशिवाय सुनील तटकरे आणि प्रफुल्ल पटेल असे दोन सरचिटणीस पक्षाकडे आहेत. एवढेच नाही तर अजित पवार हे महाराष्ट्र विधानसभेचे विरोधी पक्षनेते आहेत. शरद पवार 2024 च्या सार्वत्रिक निवडणुकांसाठी विरोधी एकजुटीचा पुरस्कार करत आहेत. अशा वेळी अजित पवारांनी बंडखोर वृत्ती दाखवली तर शरद पवारांना त्यांच्याच पक्षात अडचणींचा सामना करावा लागू शकतो.

राष्ट्रवादीत दोन गट?

राष्ट्रवादीत दोन गट पडल्याचे चित्र आहे. हे सकाळच्या शपथविधी दरम्यान दिसून आले. पहिल्या गटामध्ये खुद्द शरद पवार आणि त्यांच्या कन्या सुप्रिया सुळे आहेत, ज्यांना जयंत पाटील, जितेंद्र आव्हाड, दिलीप वळसे पाटील आणि छगन भुजबळ यांसारख्या तगड्या नेत्यांचा पाठिंबा आहे. याशिवाय अजित पवारांचा आणखी एक गट असून त्यात धनंजय मुंडे, सुनील तटकरे असे नेते आहेत. हे नेते तरुण आहेत आणि लोकांमध्येही त्यांचा चांगलाच प्रभाव आहे. वास्तविक शरद पवारांनंतर अजित पवार यांच्यासारखा मास लीडर राष्ट्रवादीत नाही. यामागे त्यांची कार्यशैली आहे. नेत्यांमध्ये आणि आपल्या भागातील लोकांमध्ये राहणाऱ्या नेत्यांपैकी ते एक आहेत.

महत्वाच्या बातम्या :

• Ajit Pawar | “गर्दी जमवण्याची वेळ आली असेल तर…”; अजित पवारांचा एकनाथ शिंदेंवर हल्ला
• Sada sarvankar | सदा सरवणकरांना गोळीबार करणं पडलं महागात, पिस्तुल ताब्यात घेण्यासाठी पोलीस दाखल
• Ajit Pawar | नाराजी नाट्यावर अजित पवारांचे स्पष्टीकरण! म्हणाले, “वास्तविक मला तिथं कोणी…”
• Neelam Gorhe | “नितेश राणेंच्या हातात मच्छर मारायची बॅट, त्याने…” ; नीलम गोऱ्हेंची टीका
• Uday Samant | नाना पटोलेंसमोर रिफायनरी विरोधकांकडून उदय सामंतांना जाळून टाकण्याची धमकी