औरंगाबाद : कायदा सुव्यवस्थेची जबाबदारी असलेल्या सोयगाव पोलीस ठाण्याच्या दोन पोलिस कर्मचाऱ्यांमध्ये दुपारी भर उन्हात मद्यधुंद अवस्थेत पाचशे रूपयांच्या देवाण घेवाणीतून ठाण्यातच हाणामारी झाली. औरंगाबाद जिल्ह्यातील सोयगाव येथे हा प्रकार घडला.
सोयगाव पोलीस ठाण्यात कार्यरत असलेले पोलीस कर्मचारी भूषण चौधरी व रोहन शिंदे यांच्यात पाचशे रुपयांच्या देवाण घेवाणीवरून सोयगाव बायपास रस्त्यावर कपडे काढून तुंबळ हाणामारी झाली. त्यानंतर त्यांची समजूत काढत सहकाऱ्याने त्यांना पोलीस ठाण्यात आणले. मात्र पोलीस ठाण्यात पुन्हा पोलीस कर्मचारी चौधरी व रोहन शिंदे या दोघांमध्ये जोरदार हाणामारी झाली.
या हाणामारीत भूषण चौधरी (३४, रा.शिवाजीनगर सिल्लोड) हे गंभीर जखमी झाले. ग्रामीण रुग्णालयाच्या वैद्यकीय सूत्रांनी (मेडिकल लीगल केस) न्याय वैद्यकीय तक्रार सोयगाव पोलीस ठाण्यात दिली आहे. मात्र अद्यापही गुन्हा दाखल करण्यात आलेला नाही. शहरासह तालुक्यात सुरू असलेल्या अवैध धंद्यांच्या आर्थिक देवाण घेवाणीतून पोलिसात झालेल्या हाणामारीची चर्चा सध्या तालुक्यात रंगू लागली आहे. मात्र वरिष्ठ पातळीवरून काय कारवाई केली जाते हे पाहणे औत्सुक्याचे ठरणार आहे.
सोयगावचे सहाय्यक पोलीस निरीक्षक सुदाम शिरसाठ यांच्याशी भ्रमणध्वनीद्वारे संपर्क साधला असता, दोघांचे वैयक्तिक भांडण आहे. तरीही पोलिसांमध्ये झालेल्या मारहाणीबाबत चौकशी करून कार्यालयीन कारवाई करण्यात येईल असे सांगितले.
महत्वाच्या बातम्या
- रणबीर कपुर आणि संजय लीला भन्साळी कोरोना पॉझिटिव्ह झाल्याने आलिया भट्ट क्वारंटाईन
- पेट्रोल-डिझेल ७५ रुपयांवर येणार? अनुराग ठाकुर यांनी राज्यसभेत दिलं उत्तर
- वर्धापन दिनी राज ठाकरेंचा कार्यकर्त्यांना ऑडिओच्या माध्यमातून संदेश
- अधिवेशन एक दिवसाने वाढवा; विधानसभा अध्यक्षपदासाठी काँग्रेसचं ठरलंय !
- ‘होय मी सीडीआर मिळवला, माझी चौकशी कराच, मात्र त्यांना सोडू नका’
