तलवार बाळगल्याप्रकरणी दोन भावांना अटक

औरंगाबाद : तलवार बाळगल्याप्रकरणी पोलिसांनी कन्नड येथील दोघांना शुक्रवारी (दि.२१) खंडाळा जानेफळ रस्त्यावर अटक केली. विकास बरबंडे (२९) व अभिषेक बरबंडे (२५), रा.जय संतोषी माता कॉलनी अशी त्यांची नावे आहेत. त्यांच्याकडुन ४० हजार रुपये किमतीची पितळी मुठ असलेली जुनी तलवार व दुचाकी असा मुद्देमाल हस्तगत करण्यात आला आहे.

शुक्रवारी सकाळी पावणे दहा वाजेच्या सुमारास खंडाळा जानेफळ रस्त्यावर दोन तरुण तलवार घेऊन दुचाकीवर फिरत असल्याची माहिती ठाणे अंमलदार एम.सी.निकाळजे यांना मिळाली. याबाबत त्यांनी वरिष्ठांना कळवल्यानंतर उपनिरीक्षक विजय जाधव, सह.उपनिरीक्षक हुकुमसिंह डांगर, पोलिस नाईक मोईस बेग, विजय खोकड यांनी तातडीने घटनास्थळी जाऊन आरोपींना ताब्यात घेतले.

याप्रकरणी जाधव यांच्या फिर्यादीवरुन आरोपींविरुद्ध भारतीय हत्यार कायद्यानुसार वैजापूर पोलिस ठाण्यात गुन्हा दाखल करण्यात आला आहे. आरोपींना न्यायालयीन कोठडी सुनावण्यात आली आहे.