कोरोनाची तिसरी लाट: औरंगाबादेत बालकांसाठी ७३७ बेड्सची व्यवस्था

🕒 1 min read

औरंगाबाद : कोरोनाच्या संभाव्य तिसर्‍या लाटेत लहान बालकांना कोरोनाची लागण होण्याचा धोका तज्ज्ञांनी वर्तवला आहे. या पार्श्‍वभूमीवर महापालिकेने जय्यत तयारी सुरु केली आहे. बालकांना कोरोनाची लागण झाल्यास त्यांच्यावर तातडीने उपचार करण्यासाठी शहरातील विविध रुग्णालयात ७३७ बेड्सची व्यवस्था करण्यात आली आहे. त्यामध्ये ४५ व्हेंटिलेटर्स आणि ४३७ ऑक्सिजनचे बेड्स असणार आहे. सोबतच एमजीएम आणि मेल्ट्रॉनमधील बाल कोविड सेंटरमध्ये पालिकेचे डॉक्टर्स कार्यरत ठेवले जाणार आहे, अशी माहिती पालिकेच्या आरोग्य वैद्यकीय अधिकारी डॉ. नीता पाडळकर यांनी दिली.

औरंगाबाद शहरात मागील काही दिवसांपासून रुग्ण संख्या घटत असल्याचे चित्र आहे. त्यामुळे एकूणच शहरात दिलासादायक वातावरण निर्माण झाले आहे. कोरोनाची दुसरी लाट थोपवण्यात आपण यशस्वी झालो असल्याचे आयुक्त आस्तिक कुमार पांडेय यांनी सांगितले आहे. मात्र तिसऱ्या लाटेचा धोकाही कमी झालेला नाही. अनेक तज्ञांनी तिसरी लाट सप्टेंबरच्या दुसऱ्या आठवड्यापर्यंत येऊ शकते असे सांगितले आहे. या तिसऱ्या लाटेमध्ये लहान बालकांना कोरोनाची लागण होण्याचा सर्वाधिक धोका वर्तविण्यात आला आहे. त्यामुळे मनपाने यासाठी तयारी सुरू केलेली आहे.

राज्य सरकारने बालकांना कोरोनाची लागण झाल्यास त्यांच्यावर तातडीने उपचार करण्याच्या दृष्टीने तयारी करण्याच्या सुचना दिल्या आहेत. पालिका प्रशासक तथा आयुक्त आस्तिककुमार पांडेय यांनी तिसर्‍या लाटेचा मुकाबला करण्यासाठी प्रशासन सज्ज असल्याचे जाहिर केले आहे. यासंदर्भात अधिक माहिती देताना डॉ. नीता पाडळकर यांनी सांगितले की, शहरात बालकांसाठी गरवारे कंपनीत बाल कोविड रुग्णालय उभारण्याचे काम प्रगतीपथावर आहे. तसेच एमजीएम स्पोर्ट कॉम्प्लेक्समध्येही शंभर बेड्सचे बाल कोविड रुग्णालय तयार केले जात आहे.

महत्त्वाच्या बातम्या

• ‘केंद्रावरील आरोपांबाबत कार्यकारी संचालकांचे वक्तव्य कंपनीचे नाही’, सीरम इन्स्टिट्यूटचा खुलासा
• ‘तीन नापासांनी मार्क एकत्र करून सरकार स्थापन केलं, आता विद्यार्थ्यांच्या भविष्याशी खेळू नये’
• ‘आम्ही पक्षाचा झेंडा वापरणार नाही,मात्र मराठा आरक्षणासाठी होणाऱ्या सर्व मोर्चात भाजपाचा सहभाग असेल’
• नांदेडच्या महिलेला फेसबूकवरील मैत्री पडली महागात, अमेरिकेतील दोघांनी लाखोंना फसवले
• ‘आदित्य नारायण’ मनसेच्या रडार वर, कानाखाली आवाज काढण्याचा दिला इशारा