औरंगाबाद : महापालिकेच्या प्राणी दत्तक योजनेला प्रतिसाद देत स्टेट बँक ऑफ इंडियाने प्राणिसंग्रहालयातील सर्व चौदा वाघ एक वर्षासाठी दत्तक घेतले आहेत. चौदा वाघांसाठी दहा लाख रुपयांच्या निधीचा धनादेश बँकेच्या अधिकाऱ्यांनी प्राणिसंग्रहालयाच्या संचालकांकडे शनिवारी (दि.२१) सुपूर्द केला.
सिद्धार्थ उद्यानात महापालिकेचे प्राणिसंग्रहालय आहे. प्राणिसंग्रहालयातील प्राण्यांसाठी महापालिकेने दत्तक योजना जाहीर केली आहे. प्रामुख्याने वाघ, बिबट्या या प्राण्यांसाठी ही योजना आहे. स्टेट बँक ऑफ इंडियाने या योजनेला प्रतिसाद देऊन, प्राणिसंग्रहालयातील सर्वच्या सर्व चौदा वाघ एक वर्षासाठी दत्तक घेतले आहेत. त्यात तीन पांढऱ्या, तर ११ पिवळ्या वाघांचा समावेश आहे.
प्राणिसंग्रहालयात झालेल्या छोटेखानी कार्यक्रमात वाघांसाठीचा निधी देण्यात आला. या वेळी खासदार इम्तियाज जलील, स्टेट बँक ऑफ इंडियाचे मुख्य विभागीय अधिकारी बलदेव प्रकाश, उपमहाव्यवस्थापक अलोककुमार चतुर्वेदी, रवी कुमार वर्मा, सहायक व्यवस्थापक सुधा प्रकाश, उप व्यवस्थापक दत्तप्रसाद पवार, प्रताप हंदराले आदी उपस्थित होते. महापालिकेचे अतिरिक्त आयुक्त बी. बी. नेमाने व प्राणिसंग्रहालयाचे संचालक डॉ. बी. एस. नाईकवाडे यांनी बँकेच्या अधिकाऱ्यांचे व खासदार जलील यांचे स्वागत केले.
याविषयी डॉ. नाईकवाडे म्हणाले, ‘बँकेने महापालिकेला दहा लाख रुपये निधी दिला आहे. या निधीतून प्राणिसंग्रहालयात नागरिकांसाठी सुविधा निर्माण व्हाव्यात अशी अपेक्षा व्यक्त करण्यात आली आहे. त्यात प्रामुख्याने प्राणिसंग्रहालय पाहण्यासाठी येणाऱ्या नागरिकांना बसण्यासाठी खुर्च्या, बाक लावणे, रेस्टिंग शेड उभारणे, पिण्याच्या पाण्याची सोय करणे, वाघांच्या पिंजऱ्यात मचाण बांधणे, रंगरंगोटी करणे आदी कामांचा समावेश असावा अशी सूचनाही केली आहे. येत्या काळात प्रशासनाकडून तशी कामे केली जाणार आहेत.’
महत्त्वाच्या बातम्या
- मोठी बातमी : मनसुख हिरेन खून प्रकरणातील गूढ उकलले ; ATSचे डीआयजी लांडे यांचा खुलासा
- नियमाचं उल्लंघन करणाऱ्या अवैध दारू विक्रेत्यांचे दुकान सील करणार : सुनील चव्हाण
- जिल्हा मध्यवर्ती बँकेच्या मतदान केंद्रावर जिल्हाधिकाऱ्यांनी वाटले मास्क
- राज्यमंत्री सत्तार आणि पोलिसात बाचाबाची!, विरोधकांकडून पैसे घेतल्याचाहि आरोप
- साष्टपिंपळगाव आंदोलनकर्ते घेणार मुख्यमंत्री उद्धव ठाकरेंची भेट
बातम्यांसाठी YouTube चॅनेल Subscribe करा
Subscribe Now
