समीर वानखेडेंच्या अडचणीत भर; शाहरुख खानकडे खंडणी मागितल्याचा आरोप

मुंबई : क्रूझ ड्रग्ज पार्टी प्रकरणातील एक पंच साक्षीदार प्रभाकर साईल याने प्रतिज्ञापत्रावर केलेल्या आरोपांमुळे नार्कोटिक्स कंट्रोल ब्युरोचे म्हणजेच एनसीबीचे मुंबई विभागीय संचालक समीर वानखेडे हे अडचणीत सापडले असताना त्यांच्यांविरुद्ध अ‍ॅड. सुधा द्विवेदी यांनी मुंबई पोलिसांकडे तक्रार केली आहे. अभिनेता शाहरुख खान याच्याकडे खंडणी मागितल्याच्या आरोपाखाली वानखेडे आणि अन्य व्यक्तींवर गुन्हा दाखल करण्यात यावा, अशी मागणी या तक्रार अर्जामधून करण्यात आली आहे.

अ‌ॅड. सुधा द्विवेदी यांनी मुंबईतील एमआरए मार्ग पोलीस स्टेशन तसेच मुंबईचे सह पोलीस आयुक्त मिलिंद भारंबे आणि लाचलुचपत प्रतिबंधक विभागाकडे याबाबत तक्रार दिली आहे. आर्यन खान याला सोडण्यासाठी अभिनेता शाहरुख खान याच्याकडे खंडणी मागितल्याप्रकरणी समीर वानखेडे आणि अन्य 5 जणांविरुद्ध एफआयआर दाखल करून याची चौकशी करण्यात यावी, अशी मागणी द्विवेदी यांनी तक्रारीत केली आहे.

तक्रारीत किरण गोसावी, सॅम डिसुझा आणि प्रभाकर साईल यांची नावे असून या सर्वांवर खंडणी मागितल्याप्रकरणी गुन्हा दाखल व्हावा, असे सुधा द्विवेदी यांनी नमूद केले आहे. सुधा द्विवेदी यांची तक्रार प्राप्त झाली असल्याचा दुजोरा एका अधिकाऱ्याने दिला. तक्रार प्राप्त झाली असली तरी याबाबत अद्याप एफआयआर नोंदवण्यात आलेले नाही, असेही या अधिकाऱ्याने स्पष्ट केले.

महत्त्वाच्या बातम्या

• हल्ली बायका पण असा चोमडेपणा करत नाहीत; नवाब मलिकांवर क्रांती भडकली
• समीर वानखेडे कोणत्याही पक्षासाठी काम करत नाहीत- क्रांती रेडकर
• ‘त्यांना आहे तिथेच ठेवा, इथे आले तर…’, फडणवीसांचे टीकास्त्र
• जगाला सध्या धार्मिक, आर्थिक व राजकीय दहशतवादापासून धोका-रामदेव बाबा
• ‘देख लो यारो, गधे घोडे दौडा रहे है…’; भातखळकरांचा मलिकांना टोला