राफेल विमाने २०२२ पर्यंत हवाई दलात, हवाईदल प्रमुखांची माहिती

हैदराबाद : फ्रान्सकडून खरेदी करण्यात येणारी ३६ राफेल लढाऊ विमाने २०२२ पर्यंत हवाई दलात समाविष्ट करण्याची योजना असल्याची माहिती हवाईदल प्रमुख आर. के. एस. भदौरिया यांनी दिली. ‘राफेलला हवाई दलाच्या ताफ्यात समाविष्ट करण्याची आमची योजना अत्यंत स्पष्ट आहे’, असे ते म्हणालेत.

‘आमचे लक्ष २०२२ आहे. हे एकदम निश्चित आहे. मी यापूर्वीही त्याचा उल्लेख केला आहे. एक किंवा दोन विमाने वगळता कोविड संबंधी कारणांमुळे थोडा विलंब होऊ शकतो. पण काही विमाने वेळेपूर्वीच येत आहेत. त्यामुळे राफेलचा समावेश करण्याच्या योजनेवर हवाई दलाचे लक्ष एकदम निश्चित आहे. संचलनाच्या आघाडीवरही दल पूर्णत: तयार आहे. त्यामुळे सर्वकाही पूर्वनियोजित वेळापत्रकानुसार होईल यात कोणतीही शंका नाही’, असे भदौरिया यांनी सांगितले. त्यांनी डुंडीगल येथे हवाई दल अकादमीच्या ‘कम्बाइंड ग्रॅज्युएशन परेड’चे निरीक्षण केल्यानंतर माध्यमांशी संवाद साधला.

शेजारी राष्ट्रांमुळे सुरक्षेचे आव्हान
भारताने २०१६ मध्ये फ्रान्सकडून ३६ राफेल विमाने खरेदी करण्याचा करार केला होता. हा सुमारे ५९ हजार कोटींचा सौदा आहे. हवाई दल परिवर्तनाच्या मोठ्या प्रक्रियेतून जात असल्याचेही भदौरिया यावेळी म्हणाले. ‘हवाई दल परिवर्तनाच्या एका महत्त्वपूर्ण कालखंडातून मार्गक्रमण करत आहे. आमच्या मोहिमांच्या प्रत्येक पैलूत तंत्रज्ञान व लढाऊ शक्तीचा अत्यंत वेगाने समावेश होत आहे. यामागे मुख्यत: आपले शेजारी व अन्य क्षेत्रांतील वाढत्या भू-राजकीय अनिश्चिततेसह आपल्यापुढील अभूतपूर्व व वेगाने बदलणाऱ्या सुरक्षा आव्हानांचे कारण आहे’, असे ते म्हणाले.

महत्वाच्या बातम्या

• ‘काँग्रेस-राष्ट्रवादीला मोठे करण्यासाठी ‘महाविकास आघाडी’ स्थापन केली काय?’, सरनाईकांचा उद्धव ठाकरेंना सवाल
• मराठा आंदोलनाची दिशा उद्या नाशकातून ठरणार
• मराठा आरक्षण; सुप्रीम कोर्टाच्या निर्णयाविरोधात विनोद पाटलांची पुनर्विचार याचिका
• ‘इच्छा व्यक्त करा; पण सध्या मुख्यमंत्रिपद रिकामे नाही’, राष्ट्रवादीचा नाना पटोले यांना टोला
• ‘…तर पुन्हा कपडे उतरवणार’ ; डब्ल्यूटीसी फायनल वर पूनम पांडेचे नवे भाष्य