बीड : कौन बनेगा करोडपती २५ लाखांची लॉटरी लागल्याचे भासवून भामट्यांनी एका तरूणाला १ लाख १२ हजार ५०० रूपयांचा गंडा घातला. मागील आठवड्यात फसवणुकीचा हा प्रकार घडला असून शिवाजीनगर पोलिसांत गुन्हा नोंद झाला.
पोलिसांनी दिलेल्या माहितीनूसार, शाहूनगर येथील रोहित प्रकाश राठोड याला १० रोजी रात्री अज्ञात भामट्याने कॉल करून केबीसीचा मॅनेजर असल्याची बतावणी केली आणि तुम्हाला २५ लाखांची लॉटरी लागल्याचे सांगितले. रोहितकडून विविध कागदपत्रे जमा करून घेण्यात आली.
त्यानंतर जीएसटी, तिकीट, खाते काढणे अशी विविध कारणे सांगून रोहितकडून १ लाख १२ हजार ५०० रूपये उकळण्यात आले आणि सोमवारी खात्यावर लॉटरीचे पैसे जमा होतील असे सांगितले. त्यानंतर भामट्यांनी फोन उचलणे बंद केल्याने आपली फसवणूक झाल्याचे रोहितच्या लक्षात आले. रोहितच्या फिर्यादीवरून शिवाजीनगर ठाण्यात गुन्हा नोंदविण्यात आला.
विवाहितेची आत्महत्या, सासरच्या तिघांवर गुन्हा
विवाहितेने गळफास घेत आत्महत्या केल्याची घटना शनिवारी बीड शहरातील अंबिका चौक परिसरातील पोस्टमन कॉलनी भागात घडली होती. या प्रकरणी शिवाजीनगर पोलिसांत तीन जणांविरोधात आत्महत्येस प्रवृत्त केल्या प्रकरणी गुन्हा नोंद करण्यात आला. मारोती किसन टकले (रा. बटेवाडी, ता. जामखेड) यांनी दिलेल्या तक्रारीनुसार, त्यांची मुलगी सविता संतोष सुळे (२५) हिचा सासरच्या मंडळींनी छळ केल्याने छळाला कंटाळून तिने शनिवारी घरातच फॅनला गळफास घेत आत्महत्या केली. या प्रकरणी पती संतोष भगवान सुळे, दीर योगेश भगवान सुळे व सासू विजूबाई भगवान सुळे यांच्याविरोधात ठाण्यात तक्रार दिली आहे.
महत्वाच्या बातम्या
- आमदारांना लॅपटॉप, गरीब विद्यार्थ्यांना का नाही?, भाजपचा मुख्यमंत्र्यांना सवाल
- इस्लाम धर्माच्या भावना दुखावल्या, वक्फ बोर्डाचे अध्यक्ष वसीम रिझवी यांच्याविरोधात तक्रार
- मंत्री धनंजय मुंडे यांचा बार्टीच्या संशोधक विद्यार्थ्यांना दिलासा
- शहरांनतर धरणांच्या नामांतराचा मुद्दा समोर, ‘या’ प्रकल्पाचे नाव बदलण्याची मागणी
- मराठा आरक्षणासंदर्भात काय होणार? आज महत्वाची सुनावणी
