लसीसाठी काढलेले ग्लोबल टेंडर मुंबई महापालिकेने केले रद्द

🕒 1 min read

मुंबई : कोरोनावर मात करण्यासाठी देशातील अधिका-अधिक नागरिकांचे लसीकरण होणे गरजेचे आहे. राज्यात कोरोनाचा वाढता प्रादुर्भाव लक्षात घेता धास्तावलेल्या जनता लसीकरणाला चांगला प्रतिसाद देत आहे. मात्र, एकीकडे कोरोनाचा वाढता धोका तर दुसरीकडे लसींचा तुटवडा यामुळे नागरिकांना मनस्ताप सहन करावा लागत आहे.

लसींचा तुटवडा असल्याने मोजक्याच ठिकाणी लसीकरण केले जात आहे. तर, नोंदणी केल्यानंतरच लसीकरण होत असले तरी साठा उपलब्ध झाला नसल्याचे कारण लसीकरण केंद्रावर दिले जात असल्याने अनेक नागरिकांना विना लसीकरणच माघारी यावं लागत आहे. याच पार्श्वभूमीवर मुंबई महानगरपालिकेने मोठा निर्णय घेतला होता. कोरोना प्रतिबंधक लसींच्या तुटवड्यामुळे मुंबई महापालिकेने कोरोना लसींसाठी ग्लोबल टेंडर काढलं होते. या टेंडरद्वारे १ कोटी डोसची मागणी करण्यात आली होती.

यासाठी देश-विदेशातील ९ कंपन्यांनी सहभाग देखील घेतला होता. परंतु आता सहभागी सर्व नऊ पुरवठादार अपुऱ्या कागदपत्रांअभावी अपात्र ठरले आहेत. त्यामुळे जागतिक स्तरावरील कंपन्यांकडून लस मिळविण्याचे पालिकेचे प्रयत्न निष्फळ ठरले आहेत. यामुळे आता महापालिकेने ग्लोबल टेंडर रद्द करण्याचा निर्णय घेतला आहे. असं असलं तरी स्पुटनिक या रशियाच्या लसीचे वितरक डॉ. रेड्डीज लॅबोरेटरीज यांच्याशी चर्चा सुरु आहे. त्यांनी प्रायोगिक तत्त्वावर काही प्रमाणात स्पुटनिक लसींचा साठा महानगरपालिकेला देण्याची तयारी दर्शविली असल्याची माहिती मुंबई महापालिकेकडून देण्यात आली आहे.

महत्त्वाच्या बातम्या 

• अतिवृष्टीग्रस्त शेतकऱ्यांसोबत विमा कंपन्यांचा अन्याय, सखोल चौकशीची भाजपची मागणी
• …तर पटोलेंच्या स्वबळाच्या नाऱ्याला आमचा पूर्ण पाठींबा असेल – संजय राऊत
• शेतकऱ्यांना वेळेत कर्जाची उपलब्धता केलीच पाहिजे, अजितदादांनी भरला दम
• पंजाबमध्ये अमरिंदर सिंह विरुद्ध सिद्धू वाद चिघळला; निवडणुकीपूर्वी काँग्रेसमध्ये घमासान
• नारायण राणेंनी संभाजीराजेंवर केलेली टीका योग्य नाही – फडणवीस