🕒 1 min read
बीड: ‘मला घरी जाऊ द्या, मला इथे जेवण मिळत नाही,’ असे म्हणत ‘मला माझ्या आई-बाबांकडे जायचे आहे’, अशी आर्त हाक केज तालुक्यातील पिसेगाव कोविड सेंटरमध्ये उपचार घेणाऱ्या एका बालिकेची आहे. कोविड सेंटर वरील जेवण चांगले नाही किंवा वेळेवर जेवण न मिळण्याचे अनेक प्रकार आपण ऐकले आहेत. असाच प्रकार केज येथील पिसेगाव व शारदा इंग्लिश स्कूलमधील कोविड सेंटरमध्ये घडला आहे.
केज येथील पिसेगाव व शारदा इंग्लिश स्कूलमधील कोविड सेंटर मध्ये जेवण, नाष्टा वेळेवर मिळत नाही. यामुळे येथील उपचार घेत असलेल्या रुग्णांचे हाल होत असल्याचे निदर्शनास आले आहे. जेवण व नाश्ता वेळेवर मिळत नसल्याचे तसेच जेवण चांगले मिळत नसल्याच्या तक्रारी करूनही जिल्हा प्रशासनाने याची दखल घेतली नाही. या दोन्ही कोविड सेंटरला जेवण व नाष्टा पुरवणाऱ्या कंत्राटदाराला बदलण्याची मागणी केली आहे. तरीही यात काहीही बदल झाला नाही.
शनिवारी पिसेगाव येथील कोविड सेंटरमध्ये उपचार घेणाऱ्या एका छोट्या मुलीचा व्हिडिओ आता सोशल मीडियावर व्हायरल होत असून तिने या व्हिडिओत ‘जेवण मिळत नसून, इथे जेवण नाष्टा याची काहीही सोय नाही. मला माझ्या आई-बाबांकडे जाऊद्या. मला इथून सोडा’, अशी आर्त हाक दिली आहे. दरम्यान आरोग्य प्रशासनाने देखील तहसीलदार यांच्याकडे १४ एप्रिल रोजीच संबंधित कंत्राटदाराची तक्रार केली असून तहसीलदारांनीही वरिष्ठांकडे याबाबत कळवले आहे. मात्र अद्यापही ‘वरिष्ठां’कडून यात काही सुधारणा झाली नाही. त्यामुळे आता या मुलीच्या तरी भावनेचा विचार ‘वरिष्ठ’ करतील का? असा सवाल रुग्ण व त्यांच्या नातेवाईकांतून केला जात आहे.
महत्वाच्या बातम्या
- दिलासादायक बातमी! भारतातील रिकव्हरी रेट युरोप-अमेरिकेपेक्षा चांगला
- १८ वर्षांवरील व्यक्तींना लस घेण्यासाठी नोंदणी अनिवार्य; नोंदणी कशी करणार ? घ्या जाणून
- संजय राऊत यांनी अशा प्रकारचा फुकटचा सल्ला उद्धव ठाकरेंना द्यावा – प्रवीण दरेकर
- लातूरात लसींचा दुष्काळ; लसीकरण केंद्रे बंद
- ‘सिस्टिम फेल झाल्याने आता ‘जन की बात’ आवश्यक’
