बीड : मुंबई उच्च न्यायालयाच्या औरंगाबाद खंडपीठाने ॲट्रॉसिटीच्या गुन्ह्यात अटकपूर्व जामीन मंजूर केल्यानंतर आरोपीने फिर्यादीच्या घरासमोर तोफा, फटाके वाजवल्याचा प्रकार समोर आला आहे. केज तालुक्यातील जानेगाव येथे ही घटना घडली. या प्रकारामुळे पोलिस ठाण्याकडे निघालेल्या फिर्यादीला आरोपीने शिवीगाळ करत लाथा बुक्क्याने मारहाण केली. तसेच जिवे मारण्याची धमकीही दिली. याप्रकरणी युसूफवडगाव पोलिसांत त्याच आरोपी विरोधात पुन्हा एक ॲट्रॉसिटीचा गुन्हा दाखल झाला आहे. यामुळे आरोपीला न्यायालयाने दिलासा देऊनही खाजून आवधान आणल्याची चर्चा परिसरात होत आहे.
मिळालेल्या माहितीनूसार, जानेगाव येथील सरपंच आम्रपाली ओव्हाळ यांचे पती विलास ओव्हाळ हे २ ऑक्टोबर २०२० रोजी केज येथून गावाकडे जात होते. यावेळी अशोक फुलचंद शिंदे व इतर दोघांनी रस्त्यात अडवून जातिवाचक शिवीगाळ करीत मारहाण केली होती. याप्रकरणी शिंदेसह दोघांविरुद्ध युसूफवडगावमध्ये ॲट्रॉसिटीचा गुन्हा दाखल झाला होता.
दरम्यान, २६ फेब्रुवारी २०२१ रोजी उच्च न्यायालयाच्या औरंगाबाद खंडपीठाने ॲट्रॉसिटीच्या गुन्ह्यात अशोक शिंदे याचा अटकपूर्व जामीन मंजूर केला. त्यानंतर अशोक शिंदे याने २६ फेब्रुवारी रात्री ८.३० वाजता फिर्यादी विलास ओव्हाळ यांच्या वस्तीत जाऊन दोन तोफा वाजवल्या. मात्र तोफा वाजवून समाधान न झालेल्या अशोक शिंदे याने काही वेळाने ओव्हाळ यांच्या घराच्या अंगणात जाऊन अॅटमबॉम्ब वाजवला.
त्यामुळे ओव्हाळ यांच्या कुटुंबात आणखी भीतीचे वातावरण पसरल्याने विलास ओव्हाळ हे त्यांचा भाऊ हनुमंत याला सोबत घेऊन युसूफवडगाव पोलिस ठाण्याकडे दुचाकीवरून निघाले होते. त्यावेळी अशोक शिंदे याने त्यांना मारहाण करत जिवे मारण्याची धमकी दिली. यानंतर अशोक शिंदेविरोधात आणखीन एक ॲट्रॉसिटीचा गुन्हा दाखल झाला.
महत्वाच्या बातम्या
- राज्याचे नवनियुक्त मुख्य सचिव सीताराम कुंटे अधिवेशन सुरु होण्याआधी शरद पवारांच्या भेटीला
- गर्लफ्रेंडचा फोटो काढत असलेल्या फोटोग्राफरवर भडकला बॉयफ्रेंड अर्जुन; अर्जुनला पाहून मलायका झाली स्तब्ध
- हिंगोली जिल्ह्यात आजपासून ७ मार्चपर्यंत संचारबंदी लागू; एसटीही बंद
- संजय राठोड यांनी राजीनामा दिल्यानंतर आता चित्रा वाघ यांच्या अडचणीत वाढ होण्याची शक्यता
- आजपासून राज्याचे अर्थसंकल्पीय अधिवेशन; राठोड, मुंडेंच्या मुद्द्यावरून विरोधक सभागृह दणाणून सोडणार ?
