नवी दिल्ली : जपानचे माजी पंतप्रधान शिंजो आबे यांची हत्या करण्यात आली आहे. आज सकाळी त्याच्यावर दोन गोळ्या झाडण्यात आल्या. हल्ल्यानंतर त्यांची प्रकृती चिंताजनक होती. यामध्ये त्यांना हृदयविकाराचा झटकाही आला होता. ६७ वर्षीय शिंजो आबे यांना वाचवण्यासाठी सर्वतोपरी प्रयत्न केले जात होते, मात्र डॉक्टरांना यात यश आले नाही. शिंगे आबे यांना गोळ्या घालणारा मारेकरी पकडला गेला आहे. हल्ल्यानंतर लगेचच त्याला घटनास्थळावरून ताब्यात घेण्यात आले.
माजी पंतप्रधान जपानच्या नारा शहरात प्रचार करत असताना जपानमध्ये ही घटना घडली. शिंजो आबे यांच्या भाषणादरम्यान हल्लेखोराने दोन गोळ्या झाडल्या. पहिली गोळी त्यांच्या छातीतून गेली. दुसरी गोळी त्यांच्या मानेवर लागली. यानंतर ते तेथे पडले आणि आजूबाजूला चेंगराचेंगरी झाली. दरम्यान, शिंजो यांना हृदयविकाराचा झटका देखील आला. त्यानंतर त्यांना एअरलिफ्ट करून रुग्णालयात दाखल करण्यात आले. मात्र त्यांना वाचवता आले नाही.
पंतप्रधान मोदींनी व्यक्त केला शोक, आबे यांच्यासोबतचा शेअर केला फोटो
पंतप्रधान नरेंद्र मोदी यांनी शिंजो आबे यांच्या निधनाबद्दल शोक व्यक्त केला असून भारतात एक दिवसाचा राष्ट्रीय दुखवटा जाहीर केला आहे. पंतप्रधान मोदींनी शिंजो आबे यांच्यासोबतचा एक फोटो शेअर केला आहे.
मोदींनी ट्विटमध्ये म्हटले आहे की, माझे एक जिवलग मित्र शिंजो आबे यांच्या दुःखद निधनाने मला धक्का बसला आहे. ते एक महान जागतिक राजकारणी, एक उत्कृष्ट नेता आणि एक उल्लेखनीय प्रशासक होते. त्यांनी आपले जीवन जपान आणि जगाला एक चांगले स्थान बनवण्यासाठी समर्पित केले. पंतप्रधान म्हणाले की, जेव्हा मी त्यांना भेटलो तेव्हा मला माहित नव्हते की ही माझी त्यांच्यासोबतची शेवटची भेट असेल.
शिंजो आबे यांच्याशी माझा संबंध अनेक वर्षांपूर्वीचा आहे. गुजरातच्या मुख्यमंत्रीपदाच्या कार्यकाळात मी त्यांना ओळखत होतो आणि मी पंतप्रधान झाल्यानंतरही आमची मैत्री कायम होती. अर्थव्यवस्थेबद्दल आणि जागतिक घडामोडींबद्दलच्या त्यांच्या तीक्ष्ण अंतर्दृष्टीचा माझ्यावर प्रभाव होता, असे मोदी म्हणाले.
महत्वाच्या बातम्या :
