अकोला : खासगी आरोग्य यंत्रणेतील अक्षम्य चुकीमुळे मूर्तिजापूर तालुक्यातील एका ८ महिन्यांच्या चिमुकलीला संक्रमित रक्त चढवण्यात आल्याने एचआयव्हीची लागण झाल्याचा धक्कादायक प्रकार समोर आला. या प्रकाराची आरोग्य मंत्री राजेश टोपे यांनी दखल घेऊन चौकशीचे आदेश दिले. दरम्यान, संबंधित डॉक्टर आणि खासगी रक्तपेढीने मात्र या प्रकरणावर हात वर केले आहेत.
मिळालेल्या माहितीनूसार, हिरपूर येथील चिमुकलीला काही दिवसांपूर्वी मूर्तिजापूर येथील बालरोगतज्ञ डॉ. प्रशांत अवघाते यांच्या रुग्णालयात दाखल केले होते. डॉक्टरांनी पांढऱ्या पेशी कमी झाल्याने रुग्णास रक्ताची आवश्यकता असल्याचे सांगत अकोला येथील बी. पी. ठाकरे रक्तपेढीतून रक्त आणण्याचा सल्ला दिला. त्यानुसार रक्त दिल्यानंतर काहीकेल्या ताप कमी होत नव्हता. पेशी वाढत नव्हत्या. त्यामुळे या मुलीस अमरावतीच्या खासगी रुग्णालयात हलवले.
तेथील डॉक्टरांना एचआयव्हीचा संशय आल्याने तपासणी केली तेव्हा अहवाल पॉझिटिव्ह आला. आई-वडिलांची चाचणी मात्र निगेटिव्ह आली. यंत्रणेतील दोषामुळे निष्पाप मुलीला एचआयव्हीची बाधा झाल्याने न्याय मिळावा यासाठी चिमुकलीच्या पित्याने आरोग्यमंत्री, पालकमंत्री, जिल्हाधिकाऱ्यांसह विविध ठिकाणी तक्रारी केल्या. दरम्यान रक्तपेढीतून मिळालेले रक्तच एचआयव्ही संक्रमित असल्याचे समोर आले आहे. या प्रकरणाची आरोग्यमंत्री राजेश टोपे यांनी गंभीर दखल घेऊन चौकशीचे आदेश दिले आहेत.
महत्त्वाच्या बातम्या
- औरंगाबादेत ९ झोनमध्ये कौशल्य विकास केंद्राची होणार सुरुवात; गरीब व गरजूंना घेता येणार लाभ!
- ‘मोदी सरकार रोजगारासाठी हानीकारक’ ; राहुल गांधींचा हल्लाबोल
- आम आदमी पार्टी पुणे महानगरपालिका निवडणुकीत पूर्ण ताकदीने उतरणार!
- बीडमध्ये राष्ट्रवादी-शिवसेनेत पुन्हा जुंपली; आमदार पुतण्यावर काका क्षीरसागरांचे गंभीर आरोप
- शुटिंगच्या वेळी घोड्याचा मृत्यू; दिग्दर्शक मणिरत्नम यांच्याविरोधात तक्रार दाखल
