Devendra Fadanvis | “ठाकरेंनी स्क्रिप्ट राईटर बदलावा”; देवेंद्र फडणवीस यांचा ठाकरेंवर निशाणा

🕒 1 min read

पुणे : ५ ऑक्टोबर रोजी मुंबईत शिवतीर्थ मैदानावर उद्धव ठाकरे गटाचा दसरा मेळावा तर बीकेसी मैदानावर एकनाथ शिंदे गटाचा दसरा मेळावा पार पडला. मेळाव्यादरम्यान दोन्ही गटांनी एकमेकांवर आरोप प्रत्यारोप करण्याची एकही संधी सोडली नाही. ठाकरे आणि शिंदे गटाकडून जोरदार शक्तिप्रदर्शनही करण्यात आले. यावेळी बोलताना उद्धव ठाकरे यांनी भाजपवर हिंदुत्वाच्या मुद्द्यावर सडकून टीका केली. या टीकेला प्रत्युत्तर देत उपमुख्यमंत्री देवेंद्र फडणवीस (Devendra Fadnavis) यांनी उद्धव ठाकरेंना टोला लगावला आहे. फडणवीस पुण्यात माध्यमांशी बोलत होते.

उद्धव ठाकरे यांचे भाषण नेहमीप्रमाणे तेच-ते होते. ठाकरे मुख्यमंत्री असताना त्यांनी कधीही मुख्यमंत्र्याचे भाषण केले नाही, ते पक्षप्रमुख म्हणूनच भाषण करीत होते. आम्हाला त्याचा कंटाळा आला असल्याचं देवेंद्र फडणवीस माध्यमांशी  म्हणाले. “त्यांनी आता आपला स्क्रिप्ट राईटर बदलावा,” असा सल्लाही देवेंद्र फडणवीस यांनी उद्धव ठाकरे यांना दिला.

खरी शिवसेना आमचीच असल्याचा दावा शिंदे गट आणि ठाकरे गट नेहमी करत असतात. यासंदर्भातील याचिका सर्वोच्च न्यायालयात देखील गेली आहे. मात्र कुणाच्या सभेला जास्त  होणार यावरून खरी शिवसेना कोणाचा हे ठरणार असल्याचं म्हंटल जात होतं. यावर देखील फडणवीस यांनी भाष्य केलं आहे. खरी शिवसेना कुणाची हे एकनाथ शिंदेंनी कालच्या मेळाव्यातून दाखवून दिले. “ठाकरेंच्या मेळाव्यापेक्षा शिंदेंच्या मेळाव्याला दुपट्ट गर्दी होती,” असे फडणवीस म्हणाले. “येत्या महापालिका निवडणुकीत शिंदेंचाच भगवा फडकणार,” असा दावाही फडणवीस यांनी यावेळी केला.