🕒 1 min read
मुंबई : राष्ट्रवादीचे खासदार अमोल कोल्हे (NCP MP Amol Kolhe) यांच्या ‘व्हाय आय किल्ड गांधी’ या चित्रपटावरुन आता नव्या वादाला सुरुवात झाल्याचे चित्र बघायला मिळत आहे. तसेच कोल्हे यांनी या चित्रपटामध्ये नथुराम गोडसेची भूमिका साकारल्याने वाद निर्माण झाला असून या भूमिकेवरून त्यांच्यावर सर्वच स्तरातून टीका केली जात आहे. असे असतांनाच कलावंत म्हणून अमोल कोल्हेंनी जी भूमिका साकारली त्याला माझा कोणताही आक्षेप नाही, अशी प्रतिक्रिया गांधीजींचे पणतू तुषार गांधी यांनी दिली आहे.
यासंदर्भात प्रसार माध्यमांशी संवाद साधत असतांना तुषार गांधी म्हणाले की,’अमोल कोल्हेंनी जी भूमिका केली आहे ती अभिनेता म्हणून केली आहे. तसेच जर त्यांना नथुराम गोडसे आवडत असेल तर त्यांना तेही स्वातंत्र्य आहे. त्यामुळे कलावंत म्हणून अमोल कोल्हे यांनी जी भूमिका केली त्याला माझा कोणताही आक्षेप नाही. परंतु, एका खुन्याचे उदात्तीकरण करण्याचा जो काही प्रयत्न आहे त्याचा निषेध करायला हवा.’ तसेच बापूंना बदनाम करण्याचे आणि नथुरामचे उदात्तीकरण करण्याचे कितीही प्रयत्न केले तरी ७० वर्षांनंतरही बापूंच्या कामाचं महत्त्व कायम आहे हे आपण पाहतोय, असेही तुषार म्हणाले आहेत.
दरम्यान, याप्रकरणी राष्ट्रवादी पक्षाचे आमदार अमोल मिटकरी (Amol Mitkari) यांनी अमोल कोल्हेंची बाजू घेतली असून यासंदर्भात ट्विट करत ते म्हणाले आहेत की,’खासदार डॉ. अमोल कोल्हे यांनी आव्हानात्मक भुमिका साकारली. एक अभिनेता म्हणुन त्यांनी नथुराम ची भुमिका पार पाडली असेल याचा अर्थ त्याचे समर्थन केले असे नाही. रामायणात त्रिवेदी यांनी रावणाची साकारलेली भुमिका आठवा प्रत्यक्षात मात्र ते रामभक्त होते हे वास्तव आहे.’
महत्वाच्या बातम्या:
- “अमोल कोल्हेंच्या भूमिकेला आमचा विरोध नाही”, राष्ट्रवादीने स्पष्ट केली भूमिका
- “अभिनेता कोणाचीही भूमिका करु शकतो मग ती अफझल खानाचीही…”, चंद्रकांत पाटलांची प्रतिक्रिया
- कोरियोग्राफर रेमो डिसूजाच्या मेव्हण्याने केली आत्महत्या? बहिण लिजेलने केला धक्कादायक खुलासा
- लोकप्रिय मुख्यमंत्र्यांच्या यादीत उद्धव ठाकरेंनी पटकावले चौथे स्थान
- “झेब्रा क्रॉसिंग नीट रंगवायला अक्कल लागते का?”, मनसेचा मुख्यमंत्री ठाकरेंना अप्रत्यक्ष टोला
