वादग्रस्त विधान करणाऱ्या प्रज्ञा सिंह ठाकूर यांच्यावर ७२ तासांची बंदी

टीम महाराष्ट्र देशा : भोपाळ लोकसभेच्या भाजप उमेदवार प्रज्ञा सिंह ठाकूर यांच्या प्रचारावर निवडणूक आयोगाने ७२ तास म्हणजेच ३ दिवसांची बंदी घातली आहे. एका वृत्तवाहिनीला दिलेल्या मुलाखतीत त्यांनी बाबरी मशिदीबाबत केलेल्या वादग्रस्त वक्तव्यामुळे निवडणूक आयोगाने प्रज्ञा ठाकूर यांच्यावर कारवाई केली आहे.

या मुलाखतीमध्ये त्यांनी म्हटलं होते की, “मी बाबरी मशिदीवर फक्त चढले नव्हती, तर ती पाडण्यासाठी मदतही केली होती, यावर मला खूप गर्व आहे, मला देवाने शक्ती दिली आहे, आम्ही देशाचे कलंक मिटवले”, असं वक्तव्य केले होते. यावर निवडणूक आयोगाने ठाकूर यांच्याकडे स्पष्टीकरण मागितले होते परंतु समाधानकारक उत्तर न मिळाल्याने निवडणूक आयोगाने ही कारवाई केली आहे.

दरम्यान, “मी निवडणूक आयोगाचा सन्मान करते. पण मी शांत राहिले, तर इतर लोक माझ्यावर टीका करतील”, अशी प्रतिक्रिया प्रज्ञा ठाकूर यांनी निवडणूक आयोगाच्या कारवाईनंतर दिली आहे.