वसमत येथे ५ लाखांच्या तांब्याच्या तारा आणि ऑइल लंपास

हिंगोली: जिल्ह्यातील वासमत येथील परभणी रोडवरील जयनगरला लागून असलेल्या कृषी व पणन मंडळाच्या केळी निर्यात सुविधा केंद्रातील विद्युत डीपी फोडून चोरांनी चोरी केली असल्याचे समोर आले आहे. केंद्रातील विद्युत डीपी फोडून तांब्याची तार व ऑइल असे मिळून एकूण सव्वा पाच लाख रुपयांचा मुद्देमाल चोरी झाल्याची माहिती समोर आली आली आहे. याबाबत शहर पोलिस ठाण्यात मंगळवार रात्री उशिरा चोरीचा गुन्हा दाखल करण्यात आला आहे.

वासमत पोलिसांनी दिलेल्या माहितीनुसार परभणी रोडवर जयनगरला लागून व गणेशपूर रोडवर कृषी व पणन मंडळाचे केळी निर्यात सुविधा केंद्र आहे. या केळी निर्यात सुविधा केंद्रामध्ये शुक्रवारी दि. २२ जून रोजी रात्रीच्या दरम्यान अज्ञात चोरट्यांनी सुरक्षा भिंतीवरुन आतमध्ये प्रवेश मिळवला. यावेळी चोरट्यांनी आतमध्ये असलेल्या कृषी मालास लक्ष न करता त्यांनी बाजूलाच तार कंपाउंडमध्ये असलेल्या विद्युत डीपीकडे आपला मोर्चा वळवला. सदरील चोरट्यांनी तार कंपाउंड तोडले व डीपी फोडून त्यातील किमती असलेली तांब्याची तार व ऑइल घेऊन पोबारा केला.

चोरी घडली त्या दिवशी रात्रीचे विद्युत भारनियमन सुरु होते. याच भारनियमणाचा फायदा घेत चोरट्यांनी हात साफ केला आहे. चोरी करण्यात आलेल्या सामानाची किंमत पाच लाख २३ हजार ३९६ रुपये एवढी आहे. चोरी झाल्याचा प्रकार मंगळवारी उघडकीस आल्यानंतर प्रल्हाद बोरगड यांनी शहर पोलिस ठाण्यात दिलेल्या फिर्यादीवरुन अज्ञात चोरट्यांविरुद्ध गुन्हा दाखल करण्यात आला आहे. घटनेचा तपास पोलिस निरीक्षक शिवाजी गरमे करत आहेत.

महत्वाच्या बातम्या 

• ‘पाठक बाई’ रावडी अंदाजात ; व्हिडीओ पाहून चाहते थक्क
• पाकिस्तानात खळबळ ; हाफिज सईदच्या घराबाहेर भीषण स्फोट
• मंदिर बंद तरीही भाविकांची गर्दी; तुळजापुरात तिसऱ्या लाटेचा धोका!
• २६ जूनचे ‘चक्का जाम’ आंदोलन भाजपमधील ओबीसी नेत्यांनी प्रतिष्ठेचे का बनवले आहे ?
• ‘विल्यमसनला तंबुत पाठवं…’ ; चाहत्याच्या अजब मागणीवर सोनूचं गजब उत्तर