पोलिसांच्या चकमकीत दोन कुख्यात नक्षलवाद्यांचा खात्मा

नागपूर : गडचिरोली जिल्ह्यात उपविभागांतर्गत येणाऱ्या पोलीस मदत केंद्र गट्टा जांभा हद्दीतील जंगल परिसरात पोलिसांशी झालेल्या चकमकीत दोन कुख्यात नक्षलवादी ठार झाले. शासनाने त्यांच्यावर आठ लाखांचे बक्षीस ठेवले होते. विनय लालू नरोटे व विवेक उर्फ सुरज उर्फ मनोहर लालू नरोटे अशी ठार झालेल्या नक्षलवाद्यांची नावे आहेत.

२१ एप्रिल २०२१ रोजी पोलीस मदत केंद्र गट्टावर गोळीबार करण्याच्या घटनेत मृतक नक्षलवाद्यांचा सहभाग होता. शासनाने त्यांच्यावर ८ लाख रुपयांचे बक्षीस ठेवले होते, अशी माहिती गडचिरोली परिक्षेत्राचे पोलीस उपमहानिरीक्षक संदीप पाटील व पोलीस अधीक्षक अंकित गोयल यांनी पत्रकार परिषदेत दिली. गट्टा जंगल परिसरात नक्षलवादी मोठ्या प्रमाणात एकत्र आले असून ते काही घातपात करण्याची शक्यता असल्याची गोपनीय माहिती पोलिसांना मिळाली. त्यानुसार पोलीस अधीक्षक अंकित गोयल यांच्या मार्गदर्शनात व हेडरीचे उपविभागीय पोलीस अधिकारी संकेत गोसावी यांच्या नेतृत्वात गट्टा जंगल परिसरात सी-६० पोलीस जवान नक्षलविरोधी अभियान राबवीत होते.

दरम्यान, जंगलात दबा धरून बसलेल्या २० ते २५ नक्षलवाद्यांनी पोलिसांना ठार मारण्याच्या उद्देशाने गोळीबार केला. पोलिसांनी स्वरक्षणासाठी प्रत्त्युतरादाखल गोळीबार केला. पोलिसांचा वाढता दबाव पाहून नक्षलवादी जंगलाचा फायदा घेत पळून गेले. चकमकीनंतर पोलिसांनी शोध अभियान राबविले असता, दोन नक्षलवाद्यांचे मृतदेह आढळून आले. घटनास्थळावरून एक ९ एमएम पिस्टल, एक भरमार व स्फोटक साहित्य व नक्षलवाद्यांचे दैनंदिन वापराचे साहित्य मोठ्या प्रमाणात जप्त करण्यात आले. चकमकीत आणखी नक्षलवादी जखमी असण्याची शक्यता आहे.

महत्वाच्या बातम्या

• ‘मोदींच्या मुत्सद्दीपणामुळे विदेशातून मदतीचा ओघ’, देवेंद्र फडणवीस यांचा दावा
• मोठी बातमी : देशातील दीडशे जिल्ह्यांत कडक लॉकडाऊन लागण्याची शक्यता
• बॉलीवूडचा सिंघम अजय देवगण दादरमध्ये उभारणार कोव्हिड सेंटर
• ‘आता जनतेने केंद्र सरकारविरोधात बंड पुकारले पाहिजे’
• मोठी बातमी; खेळाडु, समालोचकानंतर दोन पंचानी घेतली आयपीएल स्पर्धेतून माघार