दिवंगत बाळासाहेब विखे यांच्या ‘देह वेचावा कारणी’ या आत्मचरित्रात उघड झाली ही गुपिते!

अहमदनगर/ऋषिकेश घोगरे- दिवंगत नेते बाळासाहेब विखे पाटील यांच्या आत्मचरित्राच्या पुस्तकाचे प्रकाशन पंतप्रधान नरेंद्र मोदी यांच्या हस्ते काल लोणी (जि. नगर) येथे झाले. आपल्या हयातीतच त्याचे प्रकाशन व्हावे ही बाळासाहेब विखे यांची इच्छा होती. मात्र, प्रकृतीच्या कारणाने त्यांची इच्छा अपूर्णच राहिली.

या चरित्रात स्व.बाळासाहेब विखे पाटील यांनी अनेक राजकीय गुपिते उघड केली आहेत. संगमनेरचे इतिहास अभ्यासक व राजकीय विश्लेषक संतोष खेडलेकर यांनी या पुस्तकाचे थोडक्यात विश्लेषण केले आहे.

या आत्मचरित्रात नगर जिल्ह्यातील कोपरगावच्या काळे-कोल्हे यांच्या सहमतीच्या राजकारणाचे पदर विखेंनी खास आपल्या शैलीत उलगडले आहेत. अण्णासाहेब शिंदे आणि पी.बी.कडू पाटील यांच्याबद्दल काहीसे परखड भाष्य या पुस्तकात वाचायला मिळते. तसेच वाचकांना उत्सुकता असलेल्या त्यांच्या शिवसेना प्रवेशाविषयी त्यांनी सविस्तर लिहिले आहे.

शिवसेना का सोडावी लागली, शिवसेनेतील कोणत्या बड्या नेत्याला विखेंचा करिष्मा डोईजड वाटू लागला, याबाबतही त्यांनी परखड भाष्य केले आहे. या पुस्तकात जिल्ह्यातील नेत्यांपासून ते राष्ट्रीय पातळीवरील नेत्यांबद्दल लिहिलेलं आहे.

स्व.बाळासाहेब विखेंचे आत्मचरित्र म्हटले की, त्यात त्यांनी कुणावर शरसंधान केले असेल? त्यांनी कुणाबाबत चांगले लिहिले असेल व कोणाबद्दल वाईट लिहिले असेल, याची उत्सुकता अनेकांना लागली आहे. शरद पवार आणि विखे यांचे फारसे सख्य नसल्याचे मानले जात होते. पक्षाचे हायकमांड राजीव गांधींकडे शब्द टाकून शरद पवार यांना काँग्रेसमध्ये परत आणण्यात स्व.विखे यांचाही वाटा असल्याची माहिती पुस्तकात मिळते.

पुस्तकातला आणखी खळबळजनक भाग म्हणजे बाळासाहेब विखे यांना जीवे मारण्याचे काही प्रयत्न झाले याचाही उल्लेख या पुस्तकात केलेला दिसत आहे. गडाख आणि विखे निवडणूक खटला हे प्रकरणही ह्या पुस्तकात वाचकांना वाचायला मिळेल.

महत्वाच्या बातम्या-

• राज्यपालांचे मुख्यमंत्र्यांना पत्र ; जितेंद्र आव्हाडांनी उपस्थित केला ‘हा’ सवाल
• ”राज्यपालांची पत्रातील भाषा वाचून धक्का बसला ”; पवारांनी थेट मोदींना लिहिलं पत्र
• इंदुरीकर महाराजांच्या भाजप नेत्यांशी कानगोष्टी; चर्चांना उधाण
• दुसऱ्यांची उणी काढण्याआधी मुख्यमंत्र्यांनी स्वतःच्या घरातील गोष्टी निस्तराव्यात : राणे 
• महिलांवरील अत्याचार थांबेपर्यंत आघाडी सरकारला स्वस्थ बसू देणार नाही; पाटील यांचा इशारा