मारहाण करुन ट्रॅक्टरसह दोन ट्रॉलीची चोरी; पूर्णा पोलिस ठाण्यात गुन्हा

परभणी : मारहाण करीत अपहरण करून ट्रॅक्टर ट्रॉलीसह चोरून नेल्याप्रकरणी पूर्णा पोलिस ठाण्यात गुन्हा दाखल केला आहे.
ब्राह्मणगाव (ता.औंढा) येथील संदीप उर्फ बाळू उत्तम राठोड यांनी पूर्णा पोलिस ठाण्यात तक्रार दाखल केली.

त्यात शुक्रवारी दुपारी आपण पूर्णा येथील बळीराजा साखर कारखाना येथे ऊस टाकून ममदापूर येथे परत ऊस भरण्यासाठी जात होतो. त्यावेळी दुपारी तीनच्या सुमारास खुजडा गावाजवळ सोपान गोविंद शेळके (रा. शिंदेवाडी, ता. माजलगाव) यांच्यासह अन्य तिघे एका पांढर्‍या कारमधून त्यांच्याजवळ आले. त्यांनी राठोड यास खाली उतर असे म्हणत सोपान शेळके व त्याच्या सोबतच्या एकाने मारहाण करीत बळजबरीने कारमध्ये बसवले. तेथून परभणी येथे नेऊन सोडले कुणास काही सांगू नकोस, असे म्हणत जीवे मारण्याची धमकी देखील दिली.

त्याचबरोबर आपल्याजवळ असलेले ट्रॅक्टरसह (क्र. एम.एच 38 बी. 5880) दोन ट्रॉली त्यांनी चोरून नेल्या, असल्याचे तक्रारीत म्हटले आहे. अपहरण करून ट्रॅक्टर व ट्रॉली पळवल्याच्या घटनेची माहिती मिळताच, प्रभारी उपविभागीय पोलिस अधिकारी सुभाष राठोड, सहाय्यक पोलिस निरीक्षक बी. पी. चोरमले हे अन्य अधिकारी कर्मचाऱ्यांसह खुजडा येथे दाखल झाले. घटनेची माहिती घेत ट्रॅक्टरच्या शोधासाठी प्रयत्न सुरू आहेत.
दरम्यान, मारहाण करीत आपले अपहरण करून जवळील आठ लाख रुपये किंमतीचे ट्रॅक्टरसह दोन ट्रॉली चोरून नेल्याप्रकरणी पूर्णा पोलिस ठाण्यात गुन्हा दाखल केला आहे.  अधिक तपास पोलिस कर्मचारी अर्जुन रणखांब हे करीत आहेत.

महत्त्वाच्या बातम्या

• शहरात येताय, सावधान! ‘स्वॅब’से करेंगे सबका स्वागत
• प्राचार्य डॉ. शरद अदवंत यांचे निधन, शैक्षणीक-सामाजिक क्षेत्राची मोठी हानी
• ‘तारक मेहता का उल्टा चष्मा’ मधील आणखी एका व्यक्तीला कोरोनाची लागण
• एमपीएससीच्या विद्यार्थ्यांसाठी लॉकडाउनमध्येही धावणार स्मार्ट सिटी बस
• ‘नितीन राऊत साहेब…उच्च राहणीमानाचा खर्च स्वतः च्या खिशातून करा’