कोरोनामुळे मृत्यू झालेल्या शिक्षकांचे कुटुंबीय उघड्यावर, शासनाने मदत करावी शिक्षक समितीची मागणी!

औरंगाबाद : कोरोनाच्या काळात कर्तव्य बजावतांना कोविडमुळे मृत्यू होणाऱ्या कर्मचाऱ्यांना विमा कवच सानुग्रह साहाय्य लागू करण्याचा निर्णय वित्त विभागाने काढला आहे. मात्र अजूनपर्यंत यातील कुठल्याही शिक्षकांना या योजनेचा लाभ मिळू शकलेला नाही. यामुळे शिक्षकांच्या कुटुंबीयांवर उपासमारीची वेळ येऊन ठेपली आहे. शासनाने लवकरात लवकर हे प्रस्ताव मार्गी लावावे अशी मागणी प्राथमिक शिक्षक समितीने केली आहे.

राज्यातील शिक्षक व शिक्षकेत्तर कर्मचारी मोठ्या प्रमाणात कोव्हिड संबंधित कर्तव्य पार पाडत असल्यामुळे राज्यातील शिक्षकांनाही ५० लक्ष रुपयाचे विमा कवच सानुग्रह सहाय्य लागू करण्याबाबत महाराष्ट्र राज्य प्राथमिक शिक्षक समितीने १९ नोव्हेंबर २०२० शासनाकडे राज्याध्यक्ष उदय शिंदे, राज्य सरचिटणीस विजय कोंबे यांना निवेदन सादर केले होते. असे शिक्षक समितीचे राज्य प्रसिध्दी प्रमुख राजेश सावरकर यांनी सांगितले.

७ डिसेंबर २०२० च्या शालेय शिक्षण विभागाच्या पत्रास अनुसरून प्राथमिक शिक्षण संचालनालय, पुणे यांनी दि. ५ जानेवारी २०२१ रोजी सर्व क्षेत्रीय कार्यालयांना याबाबत पत्र पाठवले आहे. मात्र राज्यातील अनेक प्राथमिक शिक्षकांचा कोव्हिड संबंधित कर्तव्य बजावतांना मृत्यू होऊनही अनेक जिल्ह्यातून संबंधित शिक्षकांचे परिपूर्ण प्रस्ताव शासनाकडे पाठविण्यात आले नाहीत.

नागपूर जिल्ह्यातून केवळ दोन प्रस्ताव पाठविण्यात आले, तेही परिपूर्ण नसल्याने परत आले आहेत. कोरोनात कर्तव्य बजावतांना कोव्हिडमुळे मृत्यू झालेल्या शिक्षकांना शासनाच्या धोरणानुसार विमा कवच साहाय्य मिळण्यासंबंधाने प्रशासकीय यंत्रणांची कार्यवाही विषयक उदासीनता खेददायक आहे असे मत शिक्षक समितीने व्यक्त केले.

कोरोनामुळे मृत्यू होणाऱ्या शिक्षकांना विमा कवच / सानुग्रह सहाय्य मिळण्याबाबतचे परिपूर्ण प्रस्ताव शासनाकडे तात्काळ सादर करण्याबाबतची कार्यवाही करण्यात यावी. याबाबत पंचायत समिती शिक्षण विभागाला आवश्यक आदेश निर्गत करावे अशी मागणी केली आहे. असे शिक्षक समितीचे जिल्हाध्यक्ष विजय साळकर,जिल्हा सरचिटणीस रंजित राठोड,जिल्हा प्रसिध्दी प्रमुख सतीश कोळी यांनी कळविले आहे.

महत्त्वाच्या बातम्या

• एम. के. स्टॅलिन मुख्यमंत्रिपदी विराजमान; सर्व रेशनकार्डधारकांना मिळणार 2 हजारांची मदत
• आरोग्य कर्मचारी भरतीची माहिती संध्याकाळपर्यंत द्या, उच्च न्यायालयाचे राज्य सरकारला आदेश
• गरज पडल्यास मराठा आरक्षणासाठी एकदिवसीय अधिवेशन बोलावणार; अजितदादा सरसावले
• फायर सेफ्टी यंत्रणा आहे मात्र हाताळण्याचे कौशल्य नाही, खाजगी रुग्णालयांची प्रशिक्षणाकडे पाठ!
• ‘संजय काकडेंची विश्वासर्हता किती आहे हे पुणेकरांना चांगलच माहिती आहे’