मुंबई : या सरकारला वर्षपूर्ती होत असतानाच हे सरकार लवकरच पडेल अशी टीका भाजप नेत्यांनी पुन्हा सुरु केल्याचं दिसून येत आहे. ‘येत्या दोन ते तीन महिन्यात ठाकरे सरकार पडेल आणि आपले सरकार येईल. ते कसं येणार आहे, ते पत्रकारांना लवकरच कळवतो’ असं विधान रावसाहेब दानवे यांनी केल्यामुळे अनेकांच्या भुवया उंचावल्या.
कधी एकमेकांचे तोंडही न पाहणारे तीन पक्ष एकत्र येऊन सरकार चालवत आहेत. पण येत्या दोन ते तीन महिन्यात महाविकास आघाडीचे सरकार पडेल आणि आपले सरकार येईल, असं म्हणत त्यांनी कार्यकर्त्यांमध्ये जोश निर्माण करून दिला.
केंद्रीय राज्यमंत्री रावसाहेब दानवे यांनी असा दावा केल्यानंतर त्यावर आता राष्ट्रवादीचे सर्वेसर्वा शरद पवार यांनी प्रतिक्रिया देत रावसाहेब दानवेंची खिल्ली उडवली आहे. रावसाहेब दानवे खासदार असल्याचं माहित आहे. पण त्यांना ज्योतिषशास्त्रदेखील कळतं याची कल्पना नव्हती. त्यांना ज्योतिषशास्त्र समजतं, हे मला आत्ताच कळतंय , अशी खिल्ली शरद पवार यांनी उडवली आहे.
दरम्यान, कॉंग्रेसचे प्रदेशाध्यक्ष आणि राज्याचे महसूल मंत्री बाळासाहेब थोरात यांनी देखील दानवेंना जोरदार प्रत्युत्तर दिलं आहे. महाविकास आघाडीचे सरकार पडेल असे दिवास्वप्न भाजपाचे नेते पाहत आहेत. त्यांनी ही स्वप्ने पहात रहावीत, असा टोला थोरात यांनी रावसाहेब दानवे यांना लगावला.
तसेच मी पुन्हा येणार असे म्हणणाऱ्यांचे काय झाले, हे आपण पहातच आहोत. महाराष्ट्रात भाजपाचे कोणतेही ऑपरेशन यशस्वी होणार नाही. महाविकास आघाडी सरकारने एक वर्षाचा कार्यकाल पूर्ण केला असून पुढील चार वर्षाचा कार्यकाळ ही पूर्ण करू असा विश्वासही थोरात यांनी व्यक्त केला.
महत्वाच्या बातम्या
- प्रताप सरनाईक यांच्यावर जो इडीचा छापा पडला त्यात भाजपचा कोणताही हात नाही : पाटील
- काँग्रेसमधील तरुण नेत्यांना भाजपमध्ये यावंसं वाटत, आम्ही त्यांना घेणार आणि सरकार बनवणार – पाटील
- सत्ता मिळत नसल्यानं ते अस्वस्थ आहेत, शरद पवारांचा जोरदार घणाघात
- लस कधी येणार हे सांगू शकत नाही, पण ती सर्वांना उपलब्ध करून देणार – नरेंद्र मोदी
- १ डिसेंबरपासून बँकांच्या नियमात होणार महत्वाचा बदल, घ्या जाणून
