“…हे संविधानाच्या कोणत्या कलमात बसते?”, संजय राऊतांचा सवाल

🕒 1 min read

मुंबई: आज (२० जून) विधान परिषदेच्या १० जागांसाठी निवडणूक होत आहे. यासाठी रिंगणात एकूण ११ उमेदवार उतरले आहेत. त्यापूर्वीच शिवसेना खासदार संजय राऊत यांनी आजच्या सामना अग्रलेखातून नवाब मलिक आणि अनिल देशमुख यांना मतदानाची संधी नाकारल्याने भाजपवर निशाणा साधला आहे.

आयपीएल सामन्यांत गुजरातचा संघ ज्या पद्धतीने जिंकवून आणला (असे भाजपाचेच डॉ. सुब्रमण्यम स्वामी सांगतात) तसेच घपले करून भाजपा या निवडणुका जिंकू पाहत आहे. राज्यसभा निवडणुकीत महाविकास आघाडीची मते ‘दिल्ली’तील यंत्रणांचा वापर करून बाद करण्याची कलाबाजी भाजपाने दाखवून दिली आहेच, पण अनिल देशमुख, नवाब मलिक या विधानसभा सदस्यांना मतदानाचा अधिकार मिळू नये यासाठीही पडद्यामागून करामती केल्याच. नवाब मलिक व देशमुखांना राज्यसभेत मतदानाचा हक्क न्यायालयाने नाकारला. आता विधान परिषद निवडणुकीतही या दोन विधानसभा सदस्यांना मतदानाचा हक्क नाकारला. हे संविधानाच्या कोणत्या कलमात बसते? असा सवाल संजय राऊत यांनी केला आहे.

मलिक व देशमुख यांना बनावट पद्धतीने आरोपी केले व केंद्रीय तपास यंत्रणांनी अटक केली. त्यांच्यावरील आरोप सिद्ध व्हायचे आहेत व प्रत्यक्ष खटलाही सुरू झालेला नाही. कोणत्याही न्यायालयाने त्यांना गुन्हेगार ठरवून कोणतीही शिक्षा ठोठावलेली नाही. त्यांची आमदारकी अद्याप शाबूत असताना त्यांना मतदानाचा हक्क नाकारला हा घटनेचा, लोकशाहीचा खून आहे. कलम ३०२ खाली हत्येचा आरोप असलेल्या, फौजदारी गुन्हा सिद्ध झालेल्या कैद्यालाही तुरुंगातून मतदानाचा अधिकार कायदा अधिनियम, १९५१ प्रमाणे आहे. मलिक, देशमुख यांना पोलीस बंदोबस्तात विधान भवनात एक तासासाठी आणून मतदान करून घेता आले असते, पण देशमुख, मलिक हे विधान भवनातून भूमिगत होतील किंवा पळून जातील असे भय ‘ईडी’ला वाटले असेल. हा मूर्खपणाच आहे! अशा शब्दांत संजय राऊत यांनी संताप व्यक्त केला आहे.

महत्वाच्या बातम्या: 

• Legislative Council elections : निवडणुकीपूर्वी भाजप उमेदवाराचे गणरायाला साकडे; ट्वीट करत म्हणाले..
• “काळ आला होता भाऊवर पण बळी मिशीवाल्या मावळ्याचा जाणार”, अनिल बोंडेंचा ‘मविआ’वर निशाणा
• “राजकीय फायद्यासाठी भाजप कोणत्याही थरापर्यंत…”, संजय राऊतांचा टोला
• Legislative Council elections : विधान परिषदेसाठी महाविकास आघाडी-भाजपमध्ये लढत
• IND vs SA : भारताचं स्वप्न यावेळीही राहील अपूर्ण; निर्णायक सामना पावसामुळे रद्द