नांदेड : मराठा समाजाला अद्यापही आरक्षणाची प्रतीक्षा असून सर्वोच्च न्यायालयाने मराठा आरक्षणाचा कायदा रद्द केल्यानंतर मराठा समाज हा आक्रमक झाला आहे. यावरून सत्ताधारी आणि विरोधकांचे एकमेकांवर आरोप प्रत्यारोप सुरु आहेत. अशातच आता मराठा समाज हा पुन्हा रस्त्यावर उतरला आहे. पश्चिम महाराष्ट्रातील महापूर आणि राज्यातील कोरोनाची स्थिती ओसरल्यानंतर आता मराठा समाजाने पुन्हा आंदोलन सुरु केलं आहे.
खासदार संभाजीराजे छत्रपती यांच्या नेतृत्वात आज नांदेडमध्ये मराठा क्रांती मूक मोर्चाचे मूक आंदोलन सुरु आहे. यावेळी बोलताना संभाजीराजे यांनी मराठा आरक्षण उपसमितीचे अध्यक्ष आणि मंत्री अशोक चव्हाण यांच्यावर हल्लाबोल केला . तर वंचित बहुजन आघाडीचे नेते प्रकाश आंबेडकर यांचं कौतुक केलं आहे. मराठा आरक्षण उपसमितीचे अध्यक्ष आणि नांदेडचे पालकमंत्रिपद असलेले अशोक चव्हाण यांनी मूक आंदोलनाकडे पाठ फिरवल्याने मराठा समाजासह संभाजीराजे यांनी देखील त्यांच्यावर जाहीर नाराजी व्यक्त केली आहे.
प्रकाश आंबेडकर हे मूक आंदोलनात सामील झाले होते. इतकंच नाही तर भर पावसात ते संभाजीराजे यांच्यासोबत जमिनीवर बसले होते. नांदेडमध्ये उपस्थितांना संबोधित करताना संभाजीराजे म्हणाले, ‘प्रकाश आंबेडकर आमच्या आंदोलनात आले, त्यांचं कौतुक …! गरीब मराठ्याला न्याय द्यावा ही तुमची भूमिका. देवेंद्र फडणवीस सरकारने सांगितलं की कुणाच्याही आरक्षणाला धक्का न लावता आरक्षण देऊ. हेच या सरकारने सांगितले त्यामुळे शोषित वंचितांना आरक्षण मिळालेच पाहिजे.’
‘राज्यात अनेक जिल्ह्यात आंदोलनं झाली, त्यावेळी त्या त्या पालकमंत्र्यांनी उपस्थिती लावून पाठिंबा दिला. नांदेडचे पालकमंत्री कुठे आहेत? अशोक चव्हाण दिल्लीत सगळ्यांना भेटले, पण संभाजीराजेंना भेटण्यासाठी त्यांच्याकडे वेळ नव्हता. अशोक चव्हाण यांच्याकडे उत्तर नाही म्हणून ते इथे आले नसावेत. आमच्या आंदोलनात सगळे आले पण अशोक चव्हाण का आले नाही? आम्ही सुद्धा 96 टक्के वाले मराठे आहोत’, असं म्हणत संभाजीराजे यांनी अशोक चव्हाणांवर सडकून टीका केली आहे.
महत्वाच्या बातम्या
- पंतप्रधान नरेंद्र मोदी यांचा दूत म्हणुन जनतेची सेवा करणार -कराड
- आदिवासी समाजाला मुख्य प्रवाहात आणण्याचे पंतप्रधान नरेंद्र मोदी यांचे प्रयत्न – डॉ. भारती पवार
- ‘गोमूत्र शिंपडणारे समोर आले असते तेच गोमूत्र कोल्ड्रिंग सारखं घशात घालून पुढे निघालो असतो’
- पुणे पोलिसांची दादागिरी! दुचाकीस्वाराला गाडीसह टेम्पोत भरले, नागरिकांमधून संताप
- अशोक चव्हाणजी, आम्हीही ९६ टक्केवाले मराठे आहोत!’, संभाजीराजेंचा हल्लाबोल
