‘शरद पवारांच्या बदनामीची सुपारी फडणवीसांनी पडळकरांना दिलीये’

🕒 1 min read

कोल्हापूर : भाजपचे विधान परिषद आमदार गोपीचंद पडळकर हे गेल्या वर्षीपासून चांगलेच चर्चेत असतात. पवार कुटुंबियांसह महाविकास आघाडीवर सातत्याने केलेली बोचरी टीका, आंदोलने यामुळे अनेक वाद निर्माण झाले आहेत. गोपीचंद पडळकर हे पुन्हा एकदा राष्ट्रवादी काँग्रेसचे अध्यक्ष शरद पवार यांच्यावर सातत्याने जहरी टीका करत आहेत. तर राष्ट्रवादीकडून देखील त्यांना जोरदार प्रत्युत्तर देण्यात येतंय.

दरम्यान, ग्रामविकास मंत्री आणि राष्ट्रवादीचे नेते हसन मुश्रीफ यांनी देखील आज गोपीचंद पडळकर यांचा चांगलाच समाचार घेतला आहे. गोपीचंद पडळकर यांना माजी मुख्यमंत्री आणि विरोधी पक्षनेते देवेंद्र फडणवीस यांची फूस असल्याचा आरोप करताना त्यांना आवरा, अन्यथा आम्ही गप्प बसणार नाही, अशा इशारा मुश्रीफ यांनी दिलाय. ते कोल्हापुरात आयोजित पत्रकार परिषदेत बोलत होते.

‘शरद पवार यांना बदनाम करण्याची सुपारीच आमदार पडळकरांना देण्यात आली आहे. त्यांचा बोलविता धनी माजी मुख्यमंत्री फडणवीस आहेत. त्यांचीच पडळकरांना फूस आहे. आमच्या नेत्यांना बदनाम करण्याचा हा डाव खपवून घेतला जाणार नाही,’ असं हसन मुश्रीफ म्हणाले.

पडळकरांची पवारांवर टीका –

‘शरद पवार साडेतीन जिल्ह्याचे स्वामी आहेत. त्यांना ‘भावी पंतप्रधान’ म्हणलं जात पण त्यांचा पक्ष हा साडेतीन जिल्ह्यांपुरता आणि तीन खासदारांचा आहे. पवार मोठे आहेत हे मी मानत नाही, तुम्ही कोण मानत असाल तर तो तुमचा प्रश्न आहे,’ असा घणाघात पडळकरांनी केला होता. तसंच, ‘राष्ट्रवादी आणि काँग्रेसचं डीएनए बहुजन विरोधी आहे, म्हणूनच काँग्रेसच्या नेत्याच्या मुलाने विरोधी याचिका दाखल केली. काही जिल्ह्यासाठी मर्यादित असलेल्या नेत्यांना मी मोठे नेते मानत नाही.’ असं देखील पडळकर सोलापुरात भाष्य केलं होतं.

महत्त्वाच्या बातम्या

• महाराष्ट्रात ‘ऑपरेशन लोटस’? शाह-फडणवीस यांच्या भेटीमागे दडलंय काय?
• मराठा आरक्षण : पुनर्विचार याचिका कोर्टाने फेटाळल्यानंतर राज्यातील राजकारण ढवळून निघणार 
• जरंडेश्वर कारखान्यावरील कारवाईनंतर अजित पवारांचे प्रथमच भाष्य, म्हणाले..
• ‘सर्व काही नियमांनुसारच!’, राज्यपालांच्या पत्राला मुख्यमंत्री उद्धव ठाकरेंचे उत्तर
• फडणवीसांना केंद्रात बोलावून भाजप स्वतःच्या पायावर कुऱ्हाड का मारून घेईल ?