तुळजाभवानी देवीच्या दर्शनासाठी भक्तांना करावी लागणार ऑनलाईन बुकींग!

तुळजापूर : पाडव्यापासून म्हणजेच येत्या सोमवारपासून राज्यातील मंदिरांसह सर्व धर्मियांची प्रार्थना स्थळे उघडण्यात येणार असल्याचे मुख्यमंत्री उद्धव ठाकरे यांनी जाहीर केले आहे. हा फक्त सरकारी आदेश नसून ‘श्रीं ची इच्छा समजा असे मुख्यमंत्र्यांनी म्हटले आहे. मंदिरे सुरू करण्याची घोषणा करतानाच मुख्यमंत्री उद्धव ठाकरे यांनी राज्यातील जनतेला महत्त्वाचे आवाहनही केले आहे. मंदिरात चपला बाहेर काढून प्रवेश करायचा असतो, पण तोंडावरील मास्क मात्र सक्तीचा आहे हे विसरू नका. मंदिरे उघडतील, इतर प्रार्थनास्थळे उघडतील. आपण शिस्त पाळली तरच देवांचे आशीर्वाद आपल्याला व महाराष्ट्राला मिळतील, असे त्यांनी नागरिकांना सांगितले.

दरम्यान, महाराष्ट्राची कुलस्वामिनी आई तुळजाभवानी मातेच्या मंदिरांसह राज्यातील मंदिरे व धार्मिक स्थळे भक्तांना दर्शनासाठी खुली करण्यात येणार असून त्या अनुषंगाने तुळजापूर येथील मंदिरात तयारी करण्यात येत आहे. तुळजाभवानी देवीच्या दर्शनासाठी भक्तांना ऑनलाईन बुकींग करावी लागणार असुन दररोज 4 हजार भक्तांना दर्शन देण्याची व्यवस्था मंदिर संस्थानने केली आहे. त्यात 1 हजार पेड दर्शन पास तर 3 हजार मोफत दर्शन पास उपलब्ध असणार असल्याची माहिती जिल्हाधिकारी तथा मंदिर संस्थानचे अध्यक्ष कौस्तुभ दिवेगावकर यांनी दिली. ऑनलाइन पास सोबतच ऑफलाईन पास सुद्धा भाविकांना मंदिर परिसरात काढता येणार आहेत.

तुळजाभवानी मंदिर परिसरात असलेल्या कार्यालयात मोफत पास पद्धतीची व्यवस्था करण्यात आली आहे. तुळजाभवानी मंदिरात पहाटे 5 पासून रात्री 9 वाजेपर्यंत या 16 तासांच्या काळात भाविकांना दर्शन घेता येणार आहे. कोरोना संक्रमण टाळण्यासाठी तुळजाभवानी मंदिरात वारंवार साफसफाई, स्वच्छता व सॅनिटायझरची व्यवस्था केली जाणार असून दर 2 तासाला 500 भक्तांना मुखदर्शन दिले जाणार आहे.

महत्वाच्या बातम्या –

• वर्षानुवर्षे ज्यांनी आरक्षण घेतलं आणि प्रगती केली त्यांनी आता आरक्षण सोडायला हवं : संजय राऊत
• सेक्युलर ही एक प्रकारची ‘शिवी’, या देशात कोणीही सेक्युलर नाही, संजय राऊतांचे मोठे विधान!
• ‘आईची जुनी साडी, मुलांसाठी दिवाळीचे नवीन कपडे’, रितेशची लय भारी! पोस्ट
• ‘लागिरं झालं जी’ या मालिकेमध्ये ‘जीजी’ची भूमिका गाजवणाऱ्या जेष्ठअभिनेत्री कमल ठोके यांचं दुःखद निधन
• ही ‘श्रीं’ ची इच्छा! सोमवारपासून मंदिरांसह सर्व धार्मिक स्थळे उघडणार!