‘मुख्यमंत्री ठाकरेंनी माझे कौतूक केले, शरद पवारही माझ्या पाठिशी!’

🕒 1 min read

परभणी : राष्ट्रवादीचे नेते, अल्पसंख्यांक मंत्री नवाब मलिक आणि भाजप नेत्यांची रोज एकमेकांवर चिखलफेक सुरु असून आरोप-प्रत्यारोपांच्या फेरी झडत आहेत. मलिक आणि विधानसभेचे विरोधी पक्षनेते देवेंद्र फडणवीस यांनी एकमेकांवर गंभीर आरोप केले आहेत. मुंबई क्रूझ ड्रग्स प्रकरण आणि आर्यन खान प्रकरणावरुन राजकारण पेटलं आहे. बुधवारी झालेल्या मंत्रिमंडळाच्या बैठकीत मुख्यमंत्र्यासह मंत्रिमंडळाने मलिकांच्या भूमिकेला पाठिंबा दिल्याचे समोर आले आहे.

याबद्दल माहिती देताना आज नवाब मलिक म्हणाले की, मुख्यमंत्री उद्धव ठाकरे यांनी माझ्या कामाची प्रशंसा केली आणि संपूर्ण मंत्रिमंडळ माझ्या पाठीशी आहेत. तसेच पक्षप्रमुख शरद पवार आणि राष्ट्रवादी पक्षही पाठिशी असल्याचं मलिक यांनी माध्यमांना सांगितले. माझी लढाई ही अन्यायाविरोधात आहे. सध्या ही लढाई लढण्यासाठी मी एकटा पुरेसा असून ही लढाई पूर्णत्वास नेल्याशिवाय थांबणार नाही, असा स्पष्ट इशाराही मलिक यांनी दिला आहे.

नवाब मलिक यांनी एकामागून एक प्रकरणे व त्याचे पुरावे सादर करण्याचा धडाका लावला. गेल्या महिनाभर झालेल्या आरोप-प्रत्यारोपानंतर भाजप नेते एनसीबी व समीर वानखेडेशी जोडले गेल्याचा आरोपही मलिक यांनी केला. याचे धागेदोरे मलिकांनी अगदी थेट फडणवीसांपर्यंत जोडले. मलिक यांनी बुधवारी मंत्रिमंडळाच्या बैठकीअगोदर नवाब मलिक यांनी फडणवीस यांचे अंडरवर्ल्ड लोकांशी कसे संबंध आहेत याचा पाढा वाचला.

त्यानंतर कॅबिनेट बैठकीसाठी पोहोचलेल्या मलिकांचे मंत्रिमंडळातील सर्व सहकारी मंत्र्यांनी कौतुक करत आम्ही सर्वजण आपल्या पाठीशी असल्याची ग्वाही दिली. भाजपला जशास तसे उत्तर देण्याची गरज असून आपण कोणतीही भीती व तमा न बाळगता त्यांना उत्तर देत आहात असे सांगितले. यानंतर मुख्यमंत्री उद्धव ठाकरे यांनीसुद्धा ‘वेल डन, तुम्ही उत्तम लढाई लढत आहात. महाविकास आघाडी म्हणून आम्ही सर्वजण आपल्या पाठीशी आहोत’ अशा शब्दांत कौतुक केले. ‘नवाब मालिक यांनी घेतलेली भूमिका पुढे सुरू ठेवावी,’ अशी सूचना मुख्यमंत्र्यांनी मलिकांनी दिली आहे.

महत्त्वाच्या बातम्या

• ‘महाराष्ट्रात पाव किलो ड्रग्ज शोधणाऱ्यांनी गुजरातमधल्या…’, एनसीबीवर राऊतांचा हल्लाबोल
• मुख्यमंत्री ठाकरेंकडून नवाब मलिकांच्या पाठीवर शाबासकीची थाप!
• भाजपच्या वॉशिंग मशीनमध्ये सगळे कपडे स्वच्छ होतात-संजय राऊत
• एसटी कर्मचाऱ्यांचे अजून किती बळी सरकारला हवेत? भाजपचा सवाल
• ‘होय, आम्ही कामगारांच्या पगाराची जबाबदारी स्वीकारतो, तुम्ही राजीनामा देणार का?’