नाशिक : नाशिक शहरात नो हेल्मेट नो पेट्रोल या मोहिमेचा शुभारंभ आज जिल्ह्याचे पालकमंत्री छगन भुजबळ यांच्या हस्ते करण्यात आले. नाशिकच्या गंगापूर रोड येथील सद्भावना पेट्रोल पंप या ठिकाणी या कार्यक्रमाचे आयोजन करण्यात आले होते. नाशिक शहरात हेल्मेट सक्ती व्हावी यासाठी पोलीस आयुक्त दीपक पांडे यांच्या संकल्पनेतून ही संकल्पना राबविली जात आहे.
यावेळी छगन भुजबळ यांनी आमदार सरोज अहिरे यांना हेल्मेट परिधान केल्यानंतर पेट्रोल देण्यात आलं. तर हेल्मेट घातलेल्या पोलिसांना देखील प्रातिनिधीक स्वरुपात भुजबळ यांच्याकडून पेट्रोल देण्यात आलं. अपघातामध्ये हेल्मेट घातलेलं असल्यास जीव वाचू शकतो, असंही छगन भुजबळ म्हणाले.
हेल्मेट नसल्याने अपघातात मृत्यू झालेल्यांची संख्या मोठी आहे. हा निर्णय राबविण्यापूर्वी लोकांना पुरेसा अवधी दिला आहे. फरक एवढाच आहे, की शासन निर्णय असला तरी यापूर्वी त्याची प्रभावीपणे अंमलबजावणी झालेली नव्हती. स्वातंत्र्य दिनाचा संकल्प म्हणून या निर्णयाला महत्त्व देऊन नागरिकांनी निर्णय राबविल्यास नाशिक हे स्वतच्या सुरक्षेसाठी हेल्मेट वापरणाऱ्यांचे देशातील पहिले शहर ठरणार आहे. नाशिकला हा मान मिळावा म्हणून प्रत्येक नागरिकांचे यात योगदान असावे असे पोलिस आयुक्त दीपक पांडे यांनी सांगितले.
हेल्मेट सक्तीसंदर्भातील सक्त सूचना पोलीस आयुक्तांनी शहरातील पेट्रोल पंप चालकांना दिल्या आहेत. ज्या पेट्रोल पंपावर सूचनांचं पालन होणार नाही, अशा ठिकाणी दंडात्मक कारवाई करण्यात येणार आहे. प्रत्येकाला ही हेल्मेट सक्ती असल्याने पोलीस आयुक्त कार्यलयाकडून शहरातील पोलीस अधिकारी तसेच कर्मचारी यांना देखील हेल्मेटचे वाटप करण्यात आले आहे.
महत्वाच्या बातम्या
- भवानीच्या दरबारात मातेवर अन्याय! मुलीचा मृत्यू, डॉक्टर मोकाट; संयमाची ‘प्रतीक्षा’ संपल्याने आत्महदनाचा प्रयत्न
- आजपासून महाराष्ट्र अनलॉक, जाणून घ्या काय सुरू काय बंद?
- ‘..तर महाराष्ट्रात पुन्हा लॉकडाऊन निश्चित’, स्वातंत्र्यदिनीच मुख्यमंत्री ठाकरेंचा इशारा
- ‘मला अजितदादाही १२ आमदारांबद्दल बोलत नाहीत, तुम्ही कोण विचारणारे?’ राज्यपालांनी काँग्रेस नेत्याला सुनावले
- ‘जम्मू काश्मीरमध्ये लवकरच विधानसभा निवडणुका’, स्वातंत्र्यदिनी मोदींची मोठी घोषणा
