लॉकडाऊनमध्येही विद्यार्थ्यांसाठी बससेवा सुरूच

औरंगाबाद: शहरात शनिवार आणि रविवार असे दोन दिवस कडक लॉकडाऊन लागू करण्याचा निर्णय घेण्यात आला आहे. कोरोना रुग्णांच्या संख्येत सातत्याने वाढ होत आहे. त्यामुळे पूर्ण लॉकडाऊन करण्यापेक्षा अंशत: लॉकडाऊन लावण्याचा हा निर्णय घेतला आहे. या पार्श्वभूमीवर शहरातील अत्यावश्यक सेवा सुविधांमध्ये येणाऱ्या एसटी आणि स्मार्ट सिटी बसेसला यात परवानगी असली तरीही प्रवासी संख्येनुसारच बाहेरगावच्या बसेस सोडण्यात येतील तर स्मार्ट सिटी बंद ठेवावी का याबाबत आयुक्तांशी बोलून निर्णय घेतला जाईल अशी माहिती संबंधित विभागांकडून देण्यात आली.

कोरोना संसर्ग पुन्हा एकदा शहरात जोमाने पसरू लागला आहे. मात्र गतवर्षीच्या तुलनेत यावेळी घराघरात रुग्ण सापडत आहेत. त्यामुळे संपूर्ण शहरालाच कोरोनाने विळखा घातल्याची परिस्थिती निर्माण झाली आहे.

दररोज वेगवेगळ्या भागातील नागरिक कोरोना पॉझिटिव्ह आढळून येत आहेत. त्यामुळे अंशतः लॉकडाऊन तर शनिवारी आणि रविवार हे दोन दिवस कडक लॉकडाऊन लावण्याचा निर्णय प्रशासनाने घेतला आहे.

एसटी बससेवा, शहर बससेवा अत्यावश्यक सेवा सुविधांमध्ये मोडल्या जातात. मात्र शनिवार रविवार कडक लॉकडाऊन असेल. या दोन दिवसांमध्ये प्रवासी संख्या पाहून बाहेर गावाला जाणाऱ्या बस सोडण्यात येतील.

तसेच रविवारी एमपीएससीची परिक्षा असल्यामुळे विद्यार्थ्यांचा विचार करुन ज्या ज्या ठिकाणी परिक्षा असेल त्याठिकाणी बसेस सोडण्यात येतील. अशी माहिती एसटी विभागाच्या वतीने देण्यात आली.

तसेच शहरातील नागरिकांच्या दृष्टीने महत्त्वाची असलेली शहर बससेवा या दोन दिवसांमध्ये बंद राहतील कि सुरु याबाबत अजून निर्णय झालेला नाही. मात्र शहरातील प्रवासीच नसतील तर बस सुरु ठेवण्यात काय फायदा त्यामुळे स्मार्ट सिटी बसही बंदच ठेवल्या जातील अशी माहिती सूत्रांनी दिली. औरंगाबादमध्ये येत्या ११ मार्चपासून अंशतः लॉकडाऊन घोषित करण्यात आला आहे. हा लॉकडाऊन ४ एप्रिलपर्यंत राहिल.

महत्त्वाच्या बातम्या

• औरंगाबाद मनपा निवडणूक प्रकरण आज सुप्रीम कोर्टाच्या रजिस्ट्रारसमोर
• बेलापूरचे व्यापारी गौतम हिरण यांच्या खुनाच्या प्रकरणाचा छडा न लागल्याने व्यापारी वर्गात असंतोष
• वर्धापन दिनी राज ठाकरेंचा कार्यकर्त्यांना ऑडिओच्या माध्यमातून संदेश
• स्केटिंग करताना पडल्यानंतर जेनेलियाने सांगितली ‘मेरी रिकव्हरी पावरी स्टोरी’
• लॉकडाऊनमुळे शिक्षणाचा बोजवारा, भविष्याच्या चिंतेने विद्यार्थ्याची आत्महत्या