राज्यात बियाणे धोरण तत्काळ तयार करण्याचे कृषीमंत्री दादा भुसे यांचे आदेश

मुंबई : राज्यात बियाणे उद्योगास गतवैभव प्राप्त करून देण्यासाठी राज्याचे बियाणे धोरण तत्काळ तयार करण्याच्या सूचना कृषीमंत्री दादा भुसे यांनी कृषी विभागाला दिल्या.

मंत्री दादा भुसे यांच्या अध्यक्षतेखाली बियाणे धोरणाबाबत राज्यस्तरीय बैठक मंत्रालयात झाली. यावेळी कृषि विभागाचे सचिव एकनाथ डवले, आयुक्त धिरज कुमार, महाबिजचे व्यवस्थापकीय संचालक राहुल रेखावार, महाराष्ट्र औद्योगिक विकास महामंडळाचे मुख्य कार्यकारी अधिकारी रंगा नायक, महात्मा फुले कृषि विद्यापीठाचे संशोधन संचालक डॉ. शरद गडाख हे उपस्थित होते.

पश्चिम महाराष्ट्रात सोयाबिन पिकाची उत्पादकता जास्त असून महाबिजने येत्या खरीप हंगामात विदर्भ व मराठवाडा याबरोबरच पश्चिम महाराष्ट्रात देखील बिजोत्पादन कार्यक्रमाचे आयोजन करावे. त्याकरिता राज्यातील तज्‍ज्ञ व्यक्ती, कृषि विभाग, कृषि विद्यापिठे व महाबिज यांनी समन्वयाने शेतकरी प्रशिक्षण कार्यक्रमाची आखणी करावी जेणेकरून राज्यात भेसळमुक्त व गुणवत्तापुर्ण बियाणे निर्मिती होईल याबाबत आतापासून नियोजन केले तर येणाऱ्या वर्षभरात सकारात्मक बदल दिसून येईल, असेही कृषीमंत्र्यांनी सांगितले.

कृषीमंत्री दादा भुसे म्हणाले की, महाराष्ट्र हे बिजोत्पादनासाठी राष्ट्रीय पातळीवर अग्रेसर म्हणून गणले जात होते तथापी अलिकडच्या काळात पिक पेरणीनुसार विशेषत: सोयाबिन, कापूस यासारख्या पिकांचे बियाणे परराज्यातून आणावे लागत आहे. राज्यातील बियाणे उद्योगास गतवैभव प्राप्त करून देण्यासाठी व बियाणे उद्योगाकरिता आश्वासक वातावरण निर्मिती करण्यासाठी जाणिवपूर्वक प्रयत्न करणे गरजेचे असल्याचे त्यांनी सांगितले.

बियाणे उद्योगात आघाडी मिळवण्यासाठी राज्याची प्रत्येक पिकातील बियाणे गरज नजरेसमोर ठेवून बियाणे साखळी विकसीत करावी. यामध्ये पैदासकार व मुलभूत बिजोत्पादनाचे काटेकोर नियोजन करावे. ज्या कृषि विद्यापीठाने पिकनिहाय वाण विकसीत केला आहे ते बियाणे कृषी विद्यापीठाने मागणी प्रमाणे उपलब्ध होण्यासाठी नियाजन करावे. याबाबत सर्वस्वी जबाबदारी त्या संबधित कृषि विद्यापीठाची राहील, असे कृषीमंत्र्यांनी यावेळी सांगितले.

पैदासकार बियाणे हा बिजोत्पादन कार्यक्रमाचा पाया असल्याने त्यावर विशेष लक्ष केंद्रीत करावे. कृषि विद्यापिठाचे प्रक्षेत्र हे पैदासकार बियाणाच्या उत्पादनासाठी प्राधान्याने वापरावे. कृषि विभागाकडील तालुका बिजगुणन केंद्र, फळ रोपवाटीका यांचा देखील महाबिजने पुढाकार घेऊन बिजोत्पादनासाठी वापर करण्याच्या सूचना श्री.भुसे यांनी यावेळी दिल्या. राज्यात सीड हब उभारणीसाठी येणाऱ्या अडचणी, जागेची उपलब्धता, बिजपरिक्षण प्रयोगशाळा उभारणी, सामूहिक प्रक्रिया व सिड पॅकींग केंद्र याबाबतचा कृषीमंत्र्यांनी आढावा घेतला.

महत्वाच्या बातम्या 

• लॉकडाऊन इफेक्ट! औरंगाबाद मार्गावरील ‘या’ रेल्वे बंद होणार
• वादळाच्या संकटाची फोटोशूटसाठी संधी घेण अभिनेत्रीला पडलं महागात…
• ‘हक्क मागतोय, भीक नाही ! सरकारच्या मानेवर बसून आरक्षण मिळवण्यासाठी सज्ज व्हा…’
• ‘मी स्वतःला खूप नशीबवान समजतो..’; अर्जुन कपूरने व्यक्त केली भावना
• ‘फँड्री’ सिनेमातील शालूचा हटके अंदाज पाहून होताल थक्क …
• ‘सीआयडी’ मालिकेतील कलाकाराचे लग्नाच्या १७ वर्षांनंतर थांबले वैवाहिक आयुष्य