शरद पवारांच्या नावाने चाकणमध्ये पैशांची मागणी; मंत्रालयानंतर आणखी एक प्रकरण आले समोर

🕒 1 min read

पुणे : मंत्रालयात राष्ट्रवादी काँग्रेसचे अध्यक्ष शरद पवार यांचा हुबेहूब आवाज काढत बदलीबाबत फोन आल्याचे प्रकरण नुकतेच उघडकीस आले आहे. अशातच आता पुण्यातील चाकणमध्ये शरद पवार यांचाच आवाज काढून पैशाची मागणी झाल्याचे प्रकरण समोर आले असून चाकण पोलीस ठाण्यात गुन्हा देखील नोंदवण्यात आला आहे.

धीरज धनाजी पठारे (रा. यशवंतनगर, खराडी) यांच्यासह दोघांवर गुन्हा दाखल आहे. याप्रकरणी प्रतापराव वामन खांडेभरड (रा. कडाची वाडी, चाकण) यांनी फिर्याद दिली आहे. आरोपींची फोनद्वारे तसेच प्रत्यक्ष घरी जाऊन पाच कोटी रुपयांची मागणी केली. ‘पैसे नाही दिले तर, माझ्याशी गाठ आहे. मी तुम्हाला संपवून टाकीन’ अशी धमकी दिली. तसेच ९ ऑगस्टला एका वेबसाईटचा वापर करून तसेच अज्ञात व्यक्तिमार्फत फिर्यादीला फोन केला. इतकंच नाही तर राष्ट्रवादी काँग्रेसचे अध्यक्ष शरद पवार यांचा आवाज काढून ‘धीरज पाठारे याचे पैसे देऊन टाक अन् प्रकरण संपवून टाक’ अशी धमकी दिली होती.

नेमकं काय आहे मंत्रालयातील फोन प्रकरण ?

‘हॅलो, मी शरद पवार बोलतोय’, असा शरद पवार यांचा हुबेहूब आवाज काढत एका व्यक्तीने मंत्रालयात फोन केला. अचानक या प्रकरणात थेट शरद पवार यांचा फोन आल्याने गोंधळ निर्माण झाला. यानंतर तो फोन शरद पवार यांनी केला होता का, याची पडताळणी करण्यात आली. या पडताळणीतून हा प्रकार वेगळाच असल्याची माहिती समोर येत आहे.

शरद पवार यांचा हुबेहूब आवाज काढत सदर व्यक्तीने मंत्रालयात फोन केला. मी सिल्व्हर ओक निवासस्थानातून बोलतोय, असे म्हणत या व्यक्तीने फोन घेणाऱ्या अधिकाऱ्यासोबत बदल्यांसदर्भात चर्चा केली. अमुक एका व्यक्तीची बदली अमुक ठिकाणी करा, असा आदेशच या व्यक्तीने दिला.

दरम्यान, या कॉलबाबत शंका वाटल्याने खातरजमा करण्यासाठी मंत्रालयातील वरिष्ठ अधिकाऱ्याने सिल्व्हर ओक येथे कॉल केला. त्यावर साहेबांनी असा कोणताही कॉल केलेला नाही, असे तिथून सांगण्यात आले. त्यामुळे प्रकरणाचे गांभीर्य लक्षात घेत याबाबत पोलिसांना खबर देण्यात आली. याप्रकरणी पोलिसांनी दोन व्यक्तींना ताब्यात घेतल्याचे देखील समोर येत आहे.

महत्त्वाच्या बातम्या

• सीईटी रद्द ; अकरावी प्रवेशासाठी औरंगाबादेतील महाविद्यालय गजबजले!
• ‘मेळघाटातील ४९ नवजात शिशुंच्या मृत्युला यशोमती ठाकूर जबाबदार’, खा.नवनीत राणा स्मृती इराणींच्या भेटीला
• ‘अभाविप’ ७४ व्या स्वातंत्र्यदिनानिमित्त अनोखे उपक्रम राबविणार
• ‘हॅलो, मी शरद पवार बोलतोय!’; बदलीसाठी थेट मंत्रालयात आलेल्या ‘त्या’ फोनमुळे खळबळ
• नगर-बीड-परळी रेल्वेमार्गाबाबत खा. प्रीतम मुंडेंनी घेतली रेल्वेमंत्र्यांची भेट