सातारा-देवळाई विकासाला मिळणार हिरवा कंदिल; नगरविकास मंत्र्यांची आज बैठक

🕒 1 min read

औरंगाबाद : सातारा-देवळाई आणि शहरातील गुंठेवारी भागातील ड्रेनेजलाइनच्या कामासाठी महापालिका प्रशासन राज्य सरकारकडे निधीची मागणी करणार आहे. सातारा-देवळाई भागात ड्रेनेजलाइन टाकण्यासाठी २०० कोटी आणि गुंठेवारीच्या राहीलेल्या भागात ड्रेनेजलाइन टाकण्यासाठी १७५ कोटींच्या कामाचे नियोजन पालिकेने केले आहे. शनिवारी राज्याचे नगरविकास मंत्री एकनाथ शिंदे शहरात आहेत. यावेळी या निधीची मागणी केली जाणार असे पालिका प्रशासक तथा आयुक्त आस्तिककुमार पांडेय यांनी सांगितले.

राज्याचे नगरविकासमंत्री एकनाथ शिंदे शनिवारी शहराच्या दौऱ्यावर आहेत. यावेळी मंत्री शिंदे यांच्या उपस्थितीत एकत्रित विकास नियंत्रण नियमावलीची अंमलबजावणी आणि विकास कामांसंदर्भात आढावा बैठक होणार आहे. नगरविकास मंत्र्यांकडे पालिकेचा सेवाभरती नियम व आकृतीबंधाला मंजूरी देण्यात यावी, अशी मागणी केली जाणार आहे. त्यासोबतच पालिकेत नव्याने समावेश झालेल्या सातारा-देवळाई भागातील नागरिकांना मुलभूत सोयी-सुविधा पुरविण्याच्या दृष्टीने रस्त्यांची कामे आणि ड्रेनेजलाइन टाकावी लागणार आहे.

या भागातील रस्त्यांसाठी शासनाने आधीच ५० कोटींचा निधी दिला असून त्यातील बहुतांश रस्त्यांची कामे सुरू झाली आहे. आता या भागात ड्रेनेजलाइन टाकण्याचा डीपीआर तयार असून सरकारकडे मंजूरीसाठी पाठवलेला आहे. ड्रेनेजलाइन टाकण्यासाठी २०० कोटी रूपयाच्या निधीची आवश्यकता असल्यामुळे हा निधी उपलब्ध करुन देण्यात यावा, अशी मागणी केली जाणार आहे. सातारा-देवळाईसह गुंठेवारी भागात ड्रेनेजलाईन टाकण्यासाठी ३७५ कोटींचा निधी मिळावा, अशी मागणी नगरविकास मंत्री एकनाथ शिंदे यांच्याकडे केली जाणार आहे.

महत्वाच्या बातम्या

• जालना महानगरपालिका होणार! नगरविकास मंत्री एकनाथ शिंदेंचे संकेत
• जालना महापालिका होण्यास आमदार कैलास गोरंट्याल यांचा विरोध
• “जालना हा शिवसेनेचा बालेकिल्ला; खोतकरांनी केलेल्या विकासाच्या मागण्या पूर्ण करू”
• हिंगोलीतील असोलवाडीत कुक्कुटपालन केंद्रातील ३०० कोंबड्या दगावल्या
• भरधाव कार रस्त्याच्या कडेला असलेल्या विहिरीत कोसळली; दोघांचा मृत्यू