चिंताजनक! भारतात सापडला ओमिक्रॉनचा तिसरा रुग्ण

🕒 1 min read

गांधीनगर : दक्षिण अफ्रिकेमध्ये सापडलेल्या कोरोनाच्या नव्या व्हेरिएंटचे रुग्ण अनेक देशांमध्ये सापडले आहेत. त्यामुळे संपूर्ण जगाने पुन्हा धास्ती घेतली आहे. प्रत्येक देश आपापल्या परीने आवश्यक ते खबरदारीची पावले उचलत आहेत. कोरोनाची लाट ओसरली नाही तोच या नव्या व्हेरिएंटने डोके वर काढले आहे. भारतामध्येही या नव्या व्हेरिएंटचे 2 रुग्ण आढळले. त्यानंतर आज ओमिक्रॉनचा तिसरा रुग्ण भारतात सापडला आहे. त्यामुळे भारताची चिंता वाढली आहे.

गुजरातमधील जामनगर येथील व्यक्ती ओमिक्रॉन बाधित असल्याचे स्पष्ट झाले आहे. हा व्यक्ती आफ्रिका खंडातील झिम्बाब्वेतून परतला असल्याची माहिती मिळली आहे. त्याचा कोविड चाचणी अहवाल पॉझिटिव्ह आला होता. त्यानंतर त्याचे नमुने जीनोम सीक्वेन्सिंगसाठी पाठवण्यात आले होते. त्याचा अहवाल आज आला असून त्या अहवालामध्ये त्याला ओमिक्रॉनची लागण झाली असल्याचे निदान झाले आहे.

ओमिक्रॉनची लागण झालेल्या रुग्णाची विमानतळावर आरटी-पीसीआर चाचणी करण्यात आली असता त्याचा अहवाल पॉझिटिव्ह आला आहे. त्यानंतर या रुग्णाला विलगीकरणात ठेवण्यात आले आणि नमुने जीनोम सीक्वेन्सिंगसाठी पाठवले गेले होते. त्याचा अहवाल आला असता त्याला ओमिक्रॉन व्हेरिएंटची लागण झाली असल्याचे आज स्पष्ट झाले आहे.

कर्नाटकमध्ये ओमिक्रॉन व्हेरिएंटचे 2 रुग्ण आढळले आहेत. त्यात एक डॉक्टर आहे तर दुसरा दक्षिण आफ्रिकन नागरिक आहे. दक्षिण आफ्रिकन नागरिक बरा झाला व जीनोम सीक्वेन्सिंगचा अहवाल येण्याआधीच देशाबाहेर गेला आहे.

देशभरात सध्या ओमिक्रॉन सदृष्य लक्षणे असलेले जवळपास 56 रुग्ण असून त्यांच्या जीनोम सीक्वेन्सिंग अहवालाची प्रतीक्षा आहे. या अहवालातून आणखी काही ओमिक्रॉन बाधित रुग्ण आढळण्याची शक्यता आहे. त्यामुळेच सर्वच राज्यांत आरोग्य यंत्रणा सतर्क झाल्या आहेत. भारतातील ओमिक्रॉन बाधित रुग्णांचा आकडा हळहळू वाढू लागल्याने चिंतेत भर पडली आहे.

महत्वाच्या बातम्या:

• विरोधकांच्या आघाडीबाबत शरद पवारांच्या भूमिकेबद्दल नवाब मलिक म्हणतात, काँग्रेसशिवाय…
• ‘विरोधकांचे गळे कसे दाबायचे याचे…’, आशिष शेलारांचे टीकास्त्र
• यूपीए’ नेतृत्वाचा दैवी अधिकार कोणाचा ते येणारा काळ ठरवेल-शिवसेना
• ‘लस नाही तर बस नाही,डोकं आहे पण मेंदू नाही’ संदीप देशपांडेंचा खोचक टोला
• चाळीशीच्या पुढील नागरिकांना बुस्टर डोस द्या; वरिष्ठ शास्त्रज्ञांची केंद्राकडे शिफारस