मुंबई – केंद्र सरकारने पारित केलेले कृषी विधेयक बिल रद्द करण्यात यावे, यासाठी गेल्या दोन महिन्यांपासून दिल्लीत लाखो शेतकरी आंदोलन करीत आहेत. मात्र केंद्र सरकार कुठल्याही परिस्थितीत हे बिल रद्द करण्याच्या मनस्थितीत नसल्याचे दिसून येत आहे. काल दिल्ली तसेच आसपासच्या परिसरात शेतकरी आंदोलनाला हिंसक वळण लागले. त्या पार्श्वभूमीवर शेतकऱ्यांना पाठिंबा देण्यासाठी वंचित बहुजन आघाडीच्यावतीने राज्यभर किसान बाग आंदोलन करण्यात येणार आहे. मात्र मुंबईतील आंदोलनाला पोलिसांनी परवानगी नाकारली.
दरम्यान, हे आंदोलन शेतकऱ्यांना पाठिंबा देण्यासाठी असल्याने कुठल्याही परिस्थितीत आंदोलन करण्याचा निश्चय वंचित बहुजन आघाडीने केला असून मुंबई आंदोलन संपन्न झाले त्या नागपाडा, आरबिया हॉटेल जवळ वंचित बहुजन आघाडीचे हजारो कार्यकर्ते व मुस्लिम बांधव एकत्र येऊन हे आंदोलन यशस्वी करणार आहेत असे वंचित बहुजन आघाडी तर्फे सांगण्यात आले आहे.
दिल्लीतील शाहीन बाग आंदोलना सारखे राज्यात किसान बाग आंदोलन करण्याचा निर्णय वंचित बहुजन आघाडीचे राष्ट्रीय अध्यक्ष प्रकाश आंबेडकर यांनी घेतला. या आंदोलनासाठी अनेक मुस्लिम संघटनांना वंचित बहुजन आघाडीने पाठिंबा दिला आहे. राज्यभर हे आंदोलन होणार असून या धर्तीवर किसान बाग असे आंदोलनाचे स्वरूप असेल.
राज्यभरातील लाखो मुस्लीम बांधव या आंदोलनात उतरणार असल्याने मुंबईत ठिकठिकाणी आंदोलन होणार असून या आंदोलनाची पूर्व परवानगी पोलिसांकडे मागण्यात आली होती. मात्र ऐनवेळी पोलिसांनी परवानगी नाकारल्याने पोलिसांना हे आंदोलन होऊन द्यायचे नसल्याचे दिसून येते. केंद्रात बीजेपी सरकारने ज्याप्रकारे हे आंदोलन संपवण्याचा घाट घातला आहे. तसाच प्रकारे हे आघाडी सरकार शेतकऱ्यांना पाठिंबा देण्याऐवजी शेतकऱ्यांचे हे आंदोलन संपवण्याचा डाव रचत आहे. मात्र वंचित बहुजन आघाडी कुठल्याही परिस्थितीत किसान बाग आंदोलन केल्याशिवाय राहणार नाही. नागपाडा,आरबिया हॉटेल या ठिकाणी उद्या सकाळपासूनच वंचित बहुजन आघाडीचे हजारो कार्यकर्ते व मुस्लिम बांधव एकत्र येऊन हे आंदोलन यशस्वी करणार असल्याचे वंचित बहुजन आघाडी तर्फे सांगण्यात आले आहे.
महत्वाच्या बातम्या
- न दिसणाऱ्या शत्रू संगे युद्ध आमुचे सुरु- मुख्यमंत्री उद्धव ठाकरे
- आंदोलन करणाऱ्या शेतकऱ्यांनी हिंसाचाराचा मार्ग सोडून शांतता राखावी : दिल्ली पोलीस
- ‘विजय वडेट्टीवार यांच्या तोंडाला काळे फासणाऱ्यास जशास तसे उत्तर दिले जाईल’
- दिल्ली धुमसतीये : १८ पोलीस जखमी तर एकाची प्रकृती गंभीर
- अल्पवयीन मुलीचे अपहरण करणारा गजाआड
