धक्कादायक! अनुकंपा नोकरीसाठी शरीरसुखाची मागणी, समाजकल्याण अधिकाऱ्यावर गुन्हा

🕒 1 min read

लातूर : अनुकंपा तत्त्वावर शिक्षिकेची नोकरी देण्यासाठी लातूर जिल्हा परिषदेतील एका अधिकाऱ्याने चक्क शरीरसुखाची मागणी केल्याचा गंभीर प्रकार समोर आला आहे. या प्रकरणी समाजकल्याण अधिकारी सुनील खमितकर याच्याविरोधात विनयभंग तसेच ॲट्रॉसिटी कायद्यानुसार शिवाजीनगर पोलीस ठाण्यात गुन्हा दाखल करण्यात आला आहे.

मिळालेल्या माहितीनूसार, लातूर शहरातील एका शिक्षण संस्थेमध्ये अनुकंपा तत्त्वावर नोकरी मिळावी, नियुक्ती पत्र देण्यात यावे, या मागणीसाठी पीडिता आणि तिची आई २००७ पासून समाजकल्याण विभागात प्रयत्नशील आहेत. संबंधित खासगी शिक्षण संस्थेत शिक्षक असलेल्या पीडितेच्या वडिलांचे २००७ मध्ये निधन झालं. त्यानंतर पीडितेच्या आईने शिपाई पदावर नियुक्ती मिळावी, यासाठी जिल्हा परिषदेकडे प्रयत्न केले होते. मात्र त्यांना नियुक्ती देण्यात आली नाही. दरम्यानच्या कालावधीत पीडितेने शिक्षक पदासाठीचा अभ्यासक्रम पूर्ण केला. अनुकंपा तत्त्वावर आपणाला विशेष शिक्षक म्हणून नियुक्ती मिळावी, यासाठी प्रयत्न केले.

त्यासाठी प्रतीक्षा यादीही तयार करण्यात आली हाेती. सदर मुलगी या जागेसाठी पात्र हाेती, संस्थेकडे जागाही रिक्त होती. मात्र, नियुक्तीसाठी खमितकर हे सतत टाळटाळ करीत होते. मुलीची आर्थिक परिस्थिती हलाखीची आहे माहीत असतानाही खमितकर यांनी २२ जानेवारी रोजी सायंकाळी कार्यालयात बोलावून शरीरसुखाची मागणी केली, असा आरोप तक्रारीत करण्यात आला आहे. याप्रकरणी पीडितेच्या तक्रारीवरुन लातूरच्या शिवाजीनगर पोलिसात गुन्हा नोंद करण्यात आला असून चौकशी सुरु करण्यात आली आहे.

महत्त्वाच्या बातम्या

• बीड डीसीसी निवडणूक; मातब्बर रिंगणात उतरल्याने चुरस वाढली
• घाम पुसण्यासाठी मास्क खाली केला तरी होतोय दंड!
• कारवाईसाठी आलेल्या पालिकेच्या पथकालाच ठोठावला दंड!
• आंदोलन, वाद, आरोप-प्रत्यारोपानंतर पंकजा मुंडेंचा ‘वैद्यनाथ’ पुन्हा सुरू
• कोरोना वाढला! बीड जिल्ह्यात सायंकाळी ७ ते सकाळी ७ पर्यंत कर्फ्यू लागू