‘उद्धव ठाकरेंच्या हातात राज्य आलंय की त्यांच्यावर राज्य आलंय’, राज ठाकरेंनी उडवली खिल्ली

मुंबई : राज्यासह देशात कोरोनाचा धोका पुन्हा एकदा वाढत चालला आहे. कोरोना रुग्णांचा वाढता आकडा लक्षात घेता चिंता व्यक्त केली जात आहे. या पार्श्वभूमीवर राज्यात फक्त शनिवारी व रविवारी संपूर्ण लॉकडाऊन म्हणजेच वीकेंड लॉकडाऊन करण्यात आला असून सोमवारी रात्री आठ वाजल्यापासून कडक निर्बंध लागू करण्यात येणार आहेत. रात्री ८ ते सकाळी ७ पर्यंत रात्रीची संचारबंदी असेल. तर, दिवसभर जमावबंदी असेल. या निर्णयाला सर्वपक्षीय नेत्यांनी पाठींबा दिला आहे.

दरम्यान, मनसे अध्यक्ष राज ठाकरे व उद्धव ठाकरे या दोन्ही नेत्यांमध्ये आज पुन्हा एकदा टाळेबंदी व उपाययोजनांवर चर्चा झाली आहे. काल ( ५ एप्रिल ) राज ठाकरे यांनी महाराष्ट्राचे मुख्यमंत्री उद्धव ठाकरे यांच्याशी टाळेबंदी, निर्बंध व उपाययोजना ह्या मुद्द्यांवर दूरचित्रसंवादाच्या माध्यमातून चर्चा केली. त्यानंतर आज पत्रकार परिषद घेऊन राज ठाकरे यांनी मुख्यमंत्र्यांसोबत नेमक्या कोणत्या मुद्द्यावर चर्चा करण्यात आली याची माहिती दिली आहे.

लॉकडाऊनवर मला काही सूचना करायच्या होत्या, त्यासाठी मुख्यमंत्री उद्धव ठाकरे ह्यांची समक्ष भेट घेणार होतो पण त्यांच्या आसपास अनेक कोरोनाचे रुग्ण असल्यामुळे ते विलगीकरणात आहेत त्यामुळे आम्ही झूमवर संवाद केला, अस राज ठाकरे यांनी सांगितले आहे. मागच्या लॉकडाउनच्या वेळेला जेंव्हा परप्रांतीय कामगार निघून गेले तेंव्हा मी सरकारला सूचना केली होती की हे सगळे परत येतील तेंव्हा त्यांची मोजणी करा आणि कोरोना चाचण्या करा पण हे काही झालं नाही. महाराष्ट्रात कोरोनाचे रुग्ण सर्वाधिक आहेत असं चित्र आहे पण ह्याला काही कारणं आहेत. महाराष्ट्र हे सर्वाधिक औद्योगिकीकरण झालेलं राज्य आहे त्यामुळे बाहेरील राज्यातून मोठ्या संख्यने लोकं येतात आणि ते जिथून येतात तिथे कोरोना चाचण्यांचं प्रमाण कमी आहे. अस देखील राज ठाकरे म्हणाले आहेत.

छोट्या उद्योगांनी त्यांचं उत्पादन चालू ठेवा पण त्याची विक्री होऊ नये असं सरकारचं म्हणणं आहे, पण मुळात जर विक्री होणार नसेल तर उत्पादन का करायचं? त्यामुळे आठवड्यात किमान २ ते ३ दिवस दुकानांना विक्रीची परवानगी द्यावी. अशी मागणी राज ठाकरे यांनी मुख्यमंत्र्यांकडे केली आहे. लॉकडाऊनच्या काळात वीजबिल माफी द्यायला हवी कारण मुळात उत्पादन सुरु नाही, ऑफ़िस बंद आहेत अनेकांच्या नोकऱ्या गेल्या आहेत अशा परिस्थितीत लोकांनी भरमसाठ वीजबिल कशी भरायची? असा सवाल देखील राज ठाकरे यांनी विचारला आहे.

तर माजी गृहमंत्री अनिल देशमुख यांनी राजीनामा दिला यावर राज ठाकरे यांना प्रश्न विचारला असता त्यांनी अनिल देशमुख हा महत्त्वाचा विषय नाही, कुणाच्या सांगण्यावरून अंबानींच्या घरासमोर पोलिसांनी जिलेटिनची गाडी ठेवली? हा मुळ प्रश्न आहे. अस उत्तर देत पुन्हा एकदा मुकेश अंबानींच्या घरासमोर ठेवलेल्या स्फोटाकांच्या प्रश्नाला पुन्हा समोर आणले आहे. तर सरकार मधील उडालेल्या गोंधळावरून  ‘नक्की उद्धव ठाकरेंच्या हातात राज्य आलंय की त्यांच्यावर राज्य आलंय हे समजत नाही’, असा टोला देखील त्यांनी मुख्यमंत्र्यांना लगावला आहे

महत्वाच्या बातम्या 

• पाच राज्यातील विधानसभा मतदानाच्या पार्श्वभूमीवर पंतप्रधान मोदींचे चार भाषांमध्ये ट्विट
• कोरोनाच्या पार्श्वभूमीवर राज्यात कठोर निर्बंध, हताश मजुरांनी धरली गावची वाट
• ‘मी सांगितलं होत परप्रांतीय कामगार परत आल्यावर त्यांची मोजणी करून चाचणी करा पण’…
• परभणी जिल्हा; कोरोना सेंटरमध्ये घाणीचे साम्राज्य, पाणी ही मिळेना!
• दुकाने बंद राहिली तर माल सडेल,जागेचं भाडं आणि कामगारांचे पगार कोण देणार?