भाजपचे मराठवाड्यात आंदोलन; पंकजा मुंडे करणार नेतृत्व

टीम महाराष्ट्र देशा –  कायम दुष्काळाशी सामना करत असलेल्या मराठवाड्याच्या हक्काच्या पाण्याच्या प्रश्नासाठी भाजपच्यावतीने पंकजा मुंडे या औरंगाबाद येथे २७ जानेवारी रोजी सकाळी दहा वाजता विभागीय आयुक्त कार्यालयासमोर लाक्षणिक उपोषण करणार आहेत, अशी माहिती भाजप प्रदेश सरचिटणीस सुजितसिंह ठाकूर यांनी दिली.

प्रदेशाध्यक्ष चंद्रकांत पाटील यांच्या अध्यक्षतेखाली झालेल्या पक्षाच्या कोअर कमिटीची बैठक बुधवारी मुंबईत भाजप प्रदेश कार्यालयात झाली. मराठवाड्याच्या हक्काच्या पाण्याच्या प्रश्नाकडे महाविकास आघाडी सरकारचे लक्ष वेधण्यासाठी लाक्षणिक उपोषण करण्याचा निर्णय या बैठकीत झाला असून भाजप नेत्या आणि माजी मंत्री पंकजा मुंडे या सोमवारी उपोषण करणार आहेत.

विरोधी पक्षनेते देवेंद्र फडणवीस, रावसाहेब दानवे, विधानसभेचे माजी अध्यक्ष हरिभाऊ बागडे आणि विधान परिषदेचे विरोधी पक्षनेते प्रवीण दरेकर हेही या उपोषणात सहभागी होणार आहेत, अशी माहिती ठाकूर यांनी दिली. देवेंद्र फडणवीस यांच्या नेतृत्वातील भाजप सरकारच्या काळात मराठवाड्याच्या दुष्काळमुक्तीसाठी विविध योजना हाती घेण्यात आल्या होत्या . मात्र राज्यात नव्याने  शिवसेना, काँग्रेस व राष्ट्रवादी काँग्रेसचे आघाडी सरकार सत्तेवर आल्यानंतर त्या सरकारमधील नेत्यांचा बहुतेक वेळ एकमेकांवर कुरघोडी करण्यातच जात आहे असा टोलाही त्यांनी महाविकास आघाडीला लगावला.