टीम महाराष्ट्र देशा- गणेशोत्सवापूर्वी सिंधुदुर्गमध्ये विमानसेवा सुरु करण्यात येणार असल्याची घोषणा पालकमंत्री दीपक केसरकर यांनी केली होती. आज त्यानुसार 12 आसनी विमान बाप्पांसोबत उतरविण्यात आले. हे विमान चेन्नईहून आले होते. मात्र, यावरून सिंधुदुर्गात राजकीय वाद सुरु झाले आहेत. विमानतळासाठी डीजीसीएची परवानगी नसतानाही गृहराज्यमंत्री दीपक केसरकरांनी चिपी विमानतळावर विमान उतरवल्याचा गंभीर आरोप खासदार नारायण राणे यांनी केला आहे.
सिंधुदूर्गातील चिपी विमानतळावर चेन्नईहून उड्डाण केलेलं विमान सकाळी उतरलं होतं. चेन्नईवरुन उड्डाण केलेलं विमान गोवा एअर क्लिअरन्स मिळाल्यानंतर चिपी विमानतळावर लँड झालं. या १२ आसनी विमानातून गणपती बाप्पाचं आगमन झालं. चाचणीसाठी हे विमान उतरवण्यात आल्याचे सांगण्यात आले होते. परंतु, डीजीसीएची परवानगी नसताना हे विमान कसं उतरवण्यात आलं, असा सवाल नारायण राणेंनी उपस्थित केला आहे.
