वडगाव मावळ : कोरोना संसर्गाच्या पार्श्वभूमीवर मावळ तालुक्यातील विनाअनुदानित शाळांमधील सर्व विद्यार्थ्यांना फीमध्ये 30 टक्के सवलत देण्याबाबत तहसीलदारांनी आयोजित केलेल्या बैठकीत सहमती झाली. या व्यतिरिक्त आमदार सुनिल शेळके यांनी 5 टक्के फीचा बोजा उचलण्याची घोषणा केल्याने या विद्यार्थ्यांना एकूण 35 टक्के फी सवलत मिळणार आहे. या निर्णयामुळे सुमारे 14 हजार विद्यार्थ्यांना दिलासा मिळाला आहे.
मावळ तालुक्याचे तहसीलदार मधुसूदन बर्गे यांच्या अध्यक्षतेखाली झालेल्या बैठकीस आमदार सुनिल शेळके, माजी राज्यमंत्री संजय (बाळा) भेगडे, तहसीलदार मधुसूदन बर्गे, गटविकास अधिकारी सुधीर भागवत, गटशिक्षणाधिकारी चंद्रकांत राक्षे, संस्थाचालकांपैकी चंद्रकांत शेटे, गणेश भेगडे, संतोष खांडगे, प्रकाश ओसवाल, गणेश खांडगे, संदीप काकडे, शैलेश शहा, किशोर राजेश यांचेसह पालक सदस्य अरुण माने, जमीर नालबंद,निरंजन सावंत, सुबोध जाजू, अतुल चौधरी,अरुण वाघमारे, अर्चना दाभाडे आदींनी चर्चेत सहभाग घेतला.
शासनाच्या आदेशानुसार ट्यूशन फी व्यतिरिक्त अवांतर कोणतेही शुल्क शाळांना आकारता येणार नाही. तसेच नवीन फीवाढ करता येणार नाही, असे तहसीलदार बर्गे यांनी प्रारंभीच स्पष्ट केले. कोरोनाच्या संसर्गामुळे सर्व शैक्षणिक संस्था बंद असून काही संस्थानी ऑनलाईन शिक्षण चालू ठेवलेले आहे. या पार्श्वभूमीवर काही शैक्षणिक संस्थांनी विद्यार्थ्यांच्या पालकांना फी भरण्याचा तगादा लावलेला असून फी मध्ये सवलत द्यावी. अशी मागणी पालकांकडून होत आहे. तर काही ठिकाणी पालक व संस्थाचालक यांच्या मध्ये संघर्ष निर्माण झालेला होता.
पालकांकडून चालू शैक्षणिक वर्षात फी मध्ये 50 टक्के सवलतीची जोरदार मागणी करण्यात आली होती. संस्था या निर्णयाला तयार नव्हत्या. संस्थाचालकांनी 25 टक्क्यांपेक्षा जास्त सवलत देण्यास असमर्थता व्यक्त केली. आमदार सुनिल शेळके यांनी संस्थाचालकांनी पालकांना तीस टक्के सवलत देण्याची विनंती केली. आमदार शेळके यांनी स्वतः 5% टक्के फीचा बोजा उचलण्याची घोषणा केली. अशा प्रकारे 35 टक्के सवलत पालकांना दिली जाईल, असा सामुदायिक निर्णय करण्यात आला. मावळ तालुक्यातील फी सवलतीमुळे पालकांसह विद्यार्थ्यांना दिलासा मिळणार आहे.
महत्वाच्या बातम्या
- ‘अल्लाह’ म्हटल्याने योगाची शक्ती कमी होत नाही! काँग्रेस नेत्याचे वादग्रस्त वक्तव्य
- सेवेत सामावुन घ्या! प्रलंबित मागण्यांसाठी आशा, गटप्रवर्तकांचे जिल्हाधिकाऱ्यांना निवेदन
- केंद्रीय तपास यंत्रणांना हाताशी धरून सरकार अस्थिर करण्याचे षडयंत्र : नाना पटोले
- कोरोनाचा परिणाम; फेसबुक लाईव्हच्या माध्यमातून लातूरकरांचा ‘योग दिन’
- आजपासून ३२ स्मार्ट सिटी बस रस्त्यावर, १२ मार्गांवर होणार ४४४ फेऱ्या!
