मुंबई : महाराष्ट्राचे राज्यपाल भगतसिंग कोश्यारी यांनी मुंबईबाबत केलेल्या वक्तव्याबद्दल राज्यातील जनतेची माफी मागितली आहे. त्यांनी स्वतःहून माफीनामा जारी केला आहे. या माफीनाम्यापूर्वी त्यांनी आपले स्पष्टीकरण दिले होते आणि आपल्या वक्तव्याचा चुकीचा अर्थ काढण्यात आल्याचे म्हटले होते. मात्र वाद संपत नाही तोच राज्यभरात विरोधकांनी आंदोलन सुरू केले आणि भाजप आणि शिंदे गटानेही त्यांच्या वक्तव्यापासून दूर राहिल्यानंतर राज्यपालांनी आज माफी मागितली.
राज्यपाल माफीनाम्यात म्हणाले, “माझ्याकडून चूक झाली. समाजातील काही घटकांच्या योगदानाची चर्चा करताना चूक झाली. देशाच्या विकासात प्रत्येकाचे योगदान आहे. गेल्या तीन वर्षात मला महाराष्ट्रात खूप मान मिळाला आहे.” दोन दिवसांपूर्वी राज्यपाल म्हणाले होते की मुंबई ही राजस्थानी आणि गुजरातींमुळे आर्थिक राजधानी बनली आहे. त्यांनी मुंबई सोडली तर पैसेही उरणार नाहीत. मग महाराष्ट्रात काय उरणार?
निवेदन pic.twitter.com/dWhArBBEnK
— Bhagat Singh Koshyari (@BSKoshyari) August 1, 2022
भगतसिंग कोश्यारी काय म्हणाले-
राज्यपाल भगतसिंग कोश्यारी यांनी राज्यातील जनतेला दिलेल्या संदेशात लिहिले आहे की, “29 जुलै रोजी अंधेरी येथे झालेल्या सार्वजनिक कार्यक्रमात मुंबईच्या विकासात समाजातील काही घटकांच्या योगदानावर चर्चा करण्यात माझ्याकडून चूक झाली असावी. केवळ महाराष्ट्राच्याच नव्हे, तर संपूर्ण देशाच्या विकासात प्रत्येकाचे योगदान मोठे आहे. विशेषत: संबंधित राज्याची सर्वसमावेशकता आणि सर्वांना बरोबर घेऊन जाण्याच्या उज्ज्वल परंपरेमुळे आज आपला देश प्रगतीच्या मार्गावर चालला आहे. गेल्या तीन वर्षांत मला राज्यातील जनतेचे अपार प्रेम मिळाले आहे. यामुळे महाराष्ट्राचा आणि मराठी भाषेचा अभिमान उंचावण्याचा मी सर्वतोपरी प्रयत्न केला आहे.”
अनवधानाने काही चूक झाली असेल, तर-
पुढे माफी मागताना राज्यपालांनी लिहिले की, “त्या दिवशीच्या भाषणात माझ्याकडून अनवधानाने काही चूक झाली असेल, तर तो संपूर्ण महाराष्ट्राचा अपमान मानला जाईल, याची कल्पनाही केली नव्हती. महाराष्ट्रातील थोर संतांच्या शिकवणीला अनुसरून राज्यातील जनता मोठ्या मनाने राज्याच्या या विनम्र सेवकाला क्षमा करील, असा मला विश्वास आहे.”
महत्वाच्या बातम्या:
- Eknath Shinde and Aditya Thackeray | एकनाथ शिंदे आणि आदित्य ठाकरे आज पुण्यात आमने-सामने येणार?
- Sanjay Raut | राऊतांच्या घरी सापडलेल्या पैश्यांच्या बंडलवर एकनाथ शिंदेंचे नाव, मुख्यमंत्री म्हणतात…
- Jitendra Awhad । राजभवनाकडे निघाला होता मोर्चा, जितेंद्र आव्हाडांना पोलिसांनी घेतलं ताब्यात
- Udhav Thackeray : जेपी नड्डांचे वक्तव्य घातक ; उद्धव ठाकरेंची भाजपवर टीका
- Chandrashekhar Bavankule । शिवसेना संपवण्याच्या नड्डा यांच्या वक्तव्याला चंद्रशेखर बावनकुळे यांचं समर्थन
