‘कास्टिंग काऊच करणाऱ्यांना तात्काळ अटक करा’; राज ठाकरेंनी केलं ‘त्या’ धाडसी अभिनेत्रीचं कौतुक

🕒 1 min read

मुंबई : चित्रपट, वेब सिरीज, मालिका यामध्ये महत्वाचा रोल(भूमिका) देण्याचे आमीष दाखवून तरुण मुलींना शारीरिक संबंधाची मागणी केल्याच्या अनेक घटना समोर येत असतात. गेल्या काही वर्षांमध्ये असे गैरप्रकार वाढत असून ते रोखण्यासाठी पोलिसांसमोर मोठं आव्हान निर्माण झालं आहे. या प्रकाराला कास्टिंग काऊच असं देखील म्हटलं जातं.

दरम्यान, चार दिवसांपूर्वी महाराष्ट्र नवनिर्माण सेनेच्या चित्रपट कर्मचारी सेनेने असा गैरप्रकार करणाऱ्या परप्रांतीयांना चांगलीच अद्दल घडवली आहे. मनसे चित्रपट कर्मचारी सेनेचे उपाध्यक्ष पद्मनाभ राणे यांनी मनसेच्या महिला कार्यकर्त्यांना सोबत घेऊन या दिग्दर्शक आणि निर्मात्याला चांगलाच चोप दिला होता. यातील यादव नामक व्यक्ती हा शिवसेना चित्रपट सेनेचा पदाधिकारी असल्याचे सांगत आमदार-खासदारांशी ओळख असल्याची भीती घालत असल्याचे देखील समोर आले आहे.

या तरुण अभिनेत्रीने धाडसाने या नराधमांना अद्दल घडवण्यासाठी मनसेशी संपर्क साधला होता. आता या तरुणीची मनसे अध्यक्ष राज ठाकरे यांनी दखल घेऊन तिच्या धाडसाचे कौतुक करण्यासह कास्टिंग काऊच करणाऱ्यांना तात्काळ अटक करा आणि त्यांना कोणत्याही परिस्थितीत जामीन मिळू देऊ नका, अशी मागणीराज ठाकरेंनी ठाण्याच्या पोलीस आयुक्त्यांकडे केली आहे.

‘राज ठाकरे यांनी ठाण्याचे पोलीस आयुक्त जयजित सिंग यांच्याशी चर्चा केली. यावेळी त्यांनी कास्टिंग काऊच करणाऱ्या आरोपींना त्वरीत अटक करा. त्यांना कोणत्याही परिस्थितीत जामीन मिळू नयेत अशी कलमे लावा,’ अशी मागणी केली. यासोबतच, या कास्टिंग काऊचच्या जाळ्यात अडकलेल्या तरुणीच्या धाडसाचे त्यांनी कौतुक केलं आहे.

तरुणीने सांगितला सर्व थरार –

आज महाराष्ट्र नवनिर्माण चित्रपट कर्मचारी सेनेचे अध्यक्ष अमेय खोपकर, कार्यध्यक्षा शालिनी ठाकरे आणि मनचिसेकडे तक्रार करणाऱ्या नवोदित अभिनेत्रीने माध्यमांसमोर आपली भूमिका मांडली. यावेळी त्या अभिनेत्रीने कास्टिंग काऊच बाबत आलेला थरारक अनुभव सांगितला असता असे प्रकार किती गंभीर आहेत याची आपल्याला जाणीव होते.

’29 जुलै रोजी राहुल तिवारीचा मला फोन आला. एका हिंदी चित्रपटात रोल देत असल्याचं तो म्हणाला. मात्र प्रोड्युसरला खुश करावं लागेल, असं तो म्हणताच मी नकार दिला. पण पुन्हा वारंवार फोन येत होते. मी कुटुंबासोबत चर्चा केली आणि मुद्दाम होकार देत धडा शिकवायचा निर्णय घेतला,’ असं म्हणत त्या अभिनेत्रीने धाडसी निर्णय सर्वांसमोर सांगितला.

पुढे ती म्हणाली, ‘दुसऱ्या दिवशी मला फाऊंटन हॉटेलला बोलावण्यात आलं. हॉटेलला एकटी ये, रात्रभर थांबावं लागेल, तुझी लाईफ बनवतो, असं तो म्हणाला. आम्ही रिक्षाने तिकडे गेलो. मला त्या लोकांनी त्याच्या रिक्षाने पुढे नेलं. नंतर त्याच्या गाडीत बसवलं. त्याच्या हातात बंदूक होती. मला चार तास फिरवत होते. मी लाईव्ह लोकेशन शेअर केलं होतं. पुढे त्यांनी मला कोणती दारु घेणार, असंही विचारलं. पुढे आनंद नगरला घेऊन गेले. तिथून अलका फार्म हाऊसला नेलं. तिथे मनसेची टीम पोहोचली आणि त्यांनी मला वाचवलं.

इतकंच नाही तर पोलिसांकडून सेटलमेंट करण्याचा प्रयत्न झाल्याचा गंभीर आरोप देखील या अभिनेत्रीने केला आहे. ‘सर्व नवोदित अभिनेत्रींनी अशा लोकांना धडा शिकवला पाहिजे. पोलीस स्टेशनला गेले, तर पोलिसांनी उलट प्रश्न विचारले. सेटलमेंट करणार का, असं विचारत होते, पोलिसांनी काही मदत केली नाही,’ असं ती म्हणाली.

महत्त्वाच्या बातम्या

• प्रत्येक यशस्वी ऑलिम्पिक मेडल विजेत्याच्या मागे पंतप्रधानांचा मोठ्ठा फोटो असतो; भाई जगताप यांची टीका
• ‘लांब फेकणारा खेळाडू टोकियोला गेला नाही, त्यामुळे भारताने गोल्डन संधी गमावली’, काँग्रेसचा टोला
• ‘शब्दांचे खेळ, भावनिक आवाहन, ड्रायव्हिंगशिवाय येतंय काय? मग शरद पवारांनी कौतूक केले कशाचे?’
• प्रत्येक यशस्वी ऑलिम्पिक मेडल विजेत्याच्या मागे पंतप्रधानांचा मोठ्ठा फोटो असतो; भाई जगताप यांची टीका
• …तोपर्यंत कोरोनापासून कुणीही सुरक्षित असणार नाही – आदित्य ठाकरे