मुंबई – पंतप्रधान नरेंद्र मोदी यांनी मंगळवारी राष्ट्राला संबोधित करताना कोरोनाच्या संकटात देशवासियांनी अधिकाधिक संख्येने पुढे येऊन गरजूंना मदत करावी, असे आवाहन केले असून त्यानुसार भारतीय जनता पार्टीचे राज्यातील कार्यकर्ते कोरोनाच्या दुसऱ्या लाटेत नव्या जोमाने अधिक व्यापक सेवाकार्य करतील, अशी घोषणा प्रदेशाध्यक्ष चंद्रकांत पाटील यांनी केली.
पाटील म्हणाले की, भाजपाच्या कार्यकर्त्यांनी राज्यात कोरोनाच्या पहिल्या लाटेच्या वेळी मोठे सेवाकार्य केले होते. शहरी आणि ग्रामीण भागात सर्वत्र भाजपाच्या कार्यकर्त्यांनी जनतेला थेट मदत केली होती. राज्यात कोरोनाची दुसरी लाट आल्यानंतर सेवाकार्याची योजना पक्षाच्या पदाधिकारी – लोकप्रतिनिधींच्या ऑनलाईन बैठकीत नुकतीच निश्चित करण्यात आली आहे. त्यानुसार कार्यकर्ते कामाला लागले आहेत. पंतप्रधानांच्या आवाहनानुसार आता हे सेवाकार्य अधिक जोमाने आणि व्यापक करण्यात येईल.
त्यांनी सांगितले की, कोरोनाचा प्रतिबंध करण्यासाठी योग्य निर्बंध पाळले जावेत, यासाठी स्थानिक पातळीवर विविध सोसायट्या – गल्ल्यांमध्ये युवकांनी ‘कोविड अनुशासन कमिट्या’ बनवाव्यात अशी महत्त्वाची सूचना पंतप्रधान नरेंद्र मोदी यांनी केली आहे. महाराष्ट्रात अशा प्रकारच्या स्थानिक समित्या बनवून लोकांना मदत करण्यासाठी पक्षाचा युवा मोर्चा पुढाकार घेईल व अत्यंत प्रभावी कार्य करेल.
पंतप्रधान नरेंद्र मोदी यांनी सध्याच्या संकटावर आपण कशा प्रकारे मात करू शकतो याचा नेमका उपाय सांगितला आणि जनतेला धीर दिला. आर्थिक चक्र चालू ठेऊन लोकांची रोजीरोटी वाचवायची आणि त्याचवेळी कोरोनावर मात करायची याचा मार्ग त्यांनी दाखविला. त्या मार्गाने देश यशस्वी होईल. कोरोनाच्या पहिल्या लाटेचा भारताने पंतप्रधान नरेंद्र मोदी यांच्या नेतृत्वाखाली प्रभावी सामना केला. त्याच पद्धतीने दुसऱ्या लाटेचाही सामना करू, असा विश्वास प्रदेशाध्यक्षांनी व्यक्त केला.
महत्वाच्या बातम्या
- भोरमधील तीनशे वर्षांची परंपरा खंडीत, श्रीराम जन्मोत्सव सलग दुसऱ्यांदा रद्द
- राज्यात आरोग्य आणि आर्थिक आणीबाणी लावा, काँग्रेसच्या आमदाराचे मोदींना पत्र
- महाराष्ट्र शोकमग्न आहे! मृत रुग्णांच्या नातेवाईकांचे अश्रू कसे पुसू ? – मुख्यमंत्री
- कोरोना रुग्णांची संख्या वाढल्याने आज पासून ‘या’ जिल्ह्यात ‘जनता कर्फ्यु’
- कोरोनामुळे मृत्यू झालेल्या व्यक्तीच्या कुटुंबाला ५ लाख रुपयांची मदत जाहीर करा – रयत
