नवी मुंबई : महाराष्ट्रात राहून महाराष्ट्रातील नागरिकांचा द्वेष करणाऱ्या कंपनीला युवसेनेने चांगलाच दणका दिला आहे. ‘बिगर-महाराष्ट्रीयन उमेदवारांना नोकरी देणाऱ्या बेलापूरमधील कंपनीला युवसेनेच्या वाघांनी चांगलाच दणका दिला.
‘सेफ सीज मरिन सर्व्हिसेस’ या खासगी कंपनीचं बेलापूर येथे कार्यालय आहे. या कंपनीनं शुक्रवारी एका वर्तमानपत्रात प्रशासकीय पदांसाठी भरतीची जाहिरात दिली. ‘…बिगर महाराष्ट्रीयन उमेदवारांकडून अर्ज मागवण्यात येत आहेत…’ असा मजकूर त्या जाहिरातीत छापण्यात आला होता. यावरून मोठा गदारोळ झाला.
युवा सेनेच्या नवी मुंबईतील पदाधिकारी आणि कार्यकर्ते शुक्रवारी कंपनीच्या कार्यालयावर धडकले. अखेर कंपनीनं झालेल्या चुकीबद्दल माफी मागितली. ‘महाराष्ट्रातील उमेदवारांसाठी…’ असा मजकूर होता. पण तो ‘बिगर महाराष्ट्रीयन उमेदवारांसाठी’ असा प्रसिद्ध झाला, असं स्पष्टीकरण देण्यात आलं.
आंदोलनकर्ते कंपनीच्या कार्यालयात गेले होते. पण त्यावेळी कंपनीचे वरिष्ठ अधिकारी तिथे नव्हते. कंपनीनं झालेल्या चुकीबद्दल माफी मागितली आहे. तसं पत्र त्यांनी दिलं आहे, अशी माहिती युवा सेना नेते चेतन नाईक यांनी दिली.आपल्या राज्याचा आणि महाराष्ट्रवासियांच्या भावना दुखावण्याचा कोणताही हेतू नव्हता,’ असं स्पष्टीकरण कंपनीच्या प्रवक्त्यांनी दिलं.
