आरोग्य विभागातील पदे रिक्त, यंत्रणेवर अतिरिक्त ताण! तातडीने पदे भरण्याची आ. सतिश चव्हाणांची मागणी

औरंगाबाद :  राज्यात कोरोना रूग्णांच्या संख्येत दिवसेंदिवस वाढ होत असल्याने कर्मचार्‍यांवर मोठ्या प्रमाणावर ताण येत आहे. त्यामुळे राज्यातील सार्वजनिक आरोग्य विभाग व वैद्यकीय शिक्षण विभागातील वर्ग १ ते वर्ग ४ ची रिक्त असलेली पदे तातडीने भरावीत अशी मागणी शनिवारी (दि. १७) मराठवाडा पदवीधर मतदारसंघाचे आमदार सतीश चव्हाण यांनी राज्याचे उपमुख्यमंत्री अजित पवार, सार्वजनिक आरोग्य मंत्री राजेश टोपे, वैद्यकीय शिक्षण मंत्री अमित देशमुख यांच्याकडे केली आहे.

या पत्रात त्यांनी म्हटले आहे की, कोरोनाच्या संकट काळात आपल्या स्वत:च्या जीवाची पर्वा न करता डॉक्टर, परिचारिकांपासून ते आरोग्य सेवा देणारे कर्मचारी युध्दातील सैन्याप्रमाणे लढत आहेत. मात्र हे सैन्य तोकडे पडत असून पदांच्या तुटवड्याचा प्रश्न आरोग्य यंत्रणेसमोर उभा राहीला आहे. राज्यातील सार्वजनिक आरोग्य विभागातील वर्ग १ ते वर्ग ४ संवर्गातील रिक्त पदे भरण्यासंदर्भात ८ मार्च २०२१ रोजी विधान परिषदेत तारांकित प्रश्न उपस्थित केला होता.

राज्यात जवळपास १८,३९७ पदे रिक्त असल्याचे सार्वजनिक आरोग्य मंत्री राजेश टोपे यांनी या प्रश्नाच्या उत्तरात सांगितले होते. अनेक ठिकाणी जिल्हा शल्यचिकित्सक, जिल्हा आरोग्य अधिकारी, तालुका आरोग्य अधिकारी अशी महत्वाची पदे रिक्त असल्याचे चव्हाण यांनी म्हटले आहे. तसेच राज्यातील सर्वच शासकीय वैद्यकीय महाविद्यालय व रूग्णालयात वर्ग १ ते वर्ग ४ संवर्गातील पदे सुध्दा मोठ्या प्रमाणात रिक्त आहेत.

गोर गरीब रूग्णांसाठी महत्वाचा आधार म्हणून औरंगाबाद येथील शासकीय वैद्यकीय महाविद्यालय व रूग्णालयाला (घाटी) ओळखले जाते. मात्र याठिकाणी २०१० पासून रिक्त पदे भरण्यात आलेली नाहीत. याठिकाणी वर्ग १ ची २४, वर्ग २ ची ३७, वर्ग ३ ची २१६ तर वर्ग ४ ची २९८ अशी जवळपास ५७५ पदे रिक्त आहेत.

आरोग्य विभागातील कर्मचार्‍यांना कोरोना बाधित रूग्णांबरोबरच नॉन कॉविड रूग्णांवर देखील उपचार करावे लागत आहे. त्यामुळे आहे त्या कर्मचार्‍यांवर मोठ्या प्रमाणावर ताण येत आहे. त्यामुळे आरोग्य विभागातील वर्ग १ ते वर्ग ४ ची रिक्त असलेली पदे तातडीने भरावीत अशी मागणी सतीश चव्हाण यांनी केली आहे.

महत्त्वाच्या बातम्या

• ‘जावयाला ड्रग्स प्रकरणी एनसीबीने अटक केली म्हणून मलिकांचा केंद्रावर राग’
• लाल किल्ला हिंसाचार : दीप सिद्धूला जामीन मंजूर, ‘या’ अटींची करावी लागणार पूर्तता
• चंद्र, मंगळ पिधान युती आज सायंकाळी पहायला मिळणार! एक अद्भुत खगोलीय घटना
• ‘तिसऱ्या लाटेचा धोका असल्याने उद्योगांनी कायमस्वरूपी कोविड सुसंगत कार्यप्रणाली तयार करावी’
• रेमडेसिविर इंजेक्शनचा अतिरेक व अनावश्यक वापर टाळावा – हसन मुश्रीफ