अहमदनगर : अहमदनगर मधील जिल्हा रुग्णालयातील अतिदक्षता विभागात भीषण आग लागून ११ रुग्णांचा मृत्यू झाला होता. या विभागात कोरोनाबाधित १७ रुग्ण उपचार घेत होते. या दुर्घटनेसंदर्भात मुख्यमंत्री उद्धव ठाकरे यांनी शोकसंवेदना व्यक्त केली असून याप्रकरणी सखोल चौकशी करून हलगर्जीपणास जबाबदार असणाऱ्यांवर कठोर कारवाई करण्याचे निर्देश दिले आहेत.
तर दुसरीकडे जिल्हा रुग्णालयात शनिवारी झालेल्या अग्नितांडवानंतर जिल्हा रुग्णालयातर्फे कोणीही पोलिस ठाण्यात फिर्याद देण्यास गेले नाही. त्यामुळे तोफखाना पोलिसांनी स्वत:हून याप्रकरणी सदोष मनुष्यवधाचा गुन्हा नोंदवला आहे. सहायक पोलिस निरीक्षक जुबेर अहमद मुजावर यांनी दिलेल्या फिर्यादीवरून ‘अज्ञात’ व्यक्तींविरुद्ध हा गुन्हा नोंदवला आहे.
फिर्यादीत म्हटल्यानुसार, शनिवारी सकाळी साडेदहा वाजता जिल्हा रुग्णालयातील आयसीयु वॉर्डमध्ये अज्ञात व्यक्तीने आग लागणे, आग विझवण्याचा प्रयत्न करणे, रुग्णांचा जीव वाचवण्याचा प्रयत्न करणे, रुग्णांना तत्काळ सुरक्षित ठिकाणी हलवणे, यात हलगर्जीपणा केल्यामुळे ११ रुग्णांचे प्राण गेले आहेत. त्यामुळे या अग्निकांडाला कारणीभूत असलेल्यांविरूद्ध सदोष मनुष्यवधाचा गुन्हा नोंदवण्यात आला आहे.
जिल्हा रुग्णालयात झालेल्या अग्नीकांडाबाबत आरोग्य यंत्रणेने तत्परता दर्शवत पोलिस ठाण्यात फिर्याद देणे अपेक्षित होते. कोरोनाच्या पहिल्या लाटेमध्ये केवळ कोविड चाचणी करून घरी निघून गेलेल्या व्यक्तींवर जिल्हा रुग्णालय प्रशासनाने गुन्हे दाखल केले होते. शनिवारी मात्र जिल्हा रुग्णालय प्रशासनाची भूमिका विरोधाभास दिसून आला. त्यामुळे पोलिसांनीच संवेदनशीलता दर्शवत गुन्हा नोंदवला आहे.
महत्वाच्या बातम्या
- ‘सध्याची अवस्था म्हणजे मंत्री तुपाशी अन् कर्मचारी उपाशी’
- एसटी संपाबाबत हायकोर्टाच्या आदेशानंतर राज्य सरकारने घेतला ‘हा’ महत्त्वाचा निर्णय
- केंद्र सरकारने समीर वानखेडेचा देखील वापर केला हे येत्या काळात स्पष्ट होणार- नाना पटोले
- ‘परमबीर सिंग यांना बेपत्ता करण्याचं काम मोदी सरकारने केलं’, नाना पटोलेंचा हल्लाबोल
- आग प्रतिबंधक सुविधांसाठी २१७ कोटींची गरज- राजेश टोपे
