Abdul Sattar | अब्दुल सत्तारांना अर्जुन खोतकरांच्या शिंदे गटात प्रवेशाची भलतीच घाई! म्हणाले…

🕒 1 min read

मुंबई : महाराष्ट्राचे माजी मुख्यमंत्री उद्धव ठाकरे यांच्या अडचणी संपताना दिसत नाहीत. महाराष्ट्रात सत्ता गेल्यापासून उद्धव ठाकरे पक्षाला वाचवण्याचा प्रयत्न करत आहेत, मात्र त्यातही ते अपयशी ठरताना दिसत आहेत. पक्षाचे ज्येष्ठ नेते आणि विधानसभेतील उपनेते अर्जुन खोतकर यांनी मुख्यमंत्री एकनाथ शिंदे यांची दिल्लीत भेट घेतली होती. अर्जुन खोतकर यांचा जालना जिल्ह्यात चांगला प्रभाव मानला जातो. खोतकर आणि एकनाथ शिंदे यांच्या भेटीदरम्यान केंद्रीय मंत्री आणि भाजप नेते रावसाहेब दानवे देखील उपस्थित होते. या भेटीनंतर अर्जुन खोतकर लवकरच उद्धव ठाकरेंची साथ सोडून एकनाथ शिंदे छावणीत सामील होण्याची शक्यता वर्तवली जात आहे. मात्र खोतकर यांनी याबाबत अजून घोषणा केली नाही. दरम्यान औरंगाबादचे आमदार अब्दुल सत्तार यांनी खोतकरांच्या शिंदे गटात प्रवेशाची वेळही जाहीर करून टाकली.

दरम्यान आज मुख्यमंत्री एकनाथ शिंदेंचे पुत्र खासदार श्रीकांत शिंदे, अब्दुल सत्तार आणि अर्जुन खोतकर यांच्यात आज बैठक झाली आहे. त्यामुळे खोतकर एकनाथ शिंदे गटात येतील की नाही हे काही दिवसात स्पष्ट होईल. मात्र अब्दुल सत्तार म्हणाले, “मुख्यमंत्री एकनाथ शिंदे रविवारी औरंगाबाद दौऱ्यावर आहेत. सिल्लोड मतदार संघात ते मेळावा घेणार आहेत. याच मेळाव्यात खोतकरांचा शिंदे गटात प्रवेश होईल”. अब्दुल सत्तारांच्या या विधानामुळे राजकीय वर्तुळात चर्चेला उधाण आलं आहे. तर खोतकर यांनी शिवसेना पक्ष प्रमुख उद्धव ठाकरे यांच्याशी बोलून निर्णय घेणार असल्याचे सांगितले.

 अर्जुन खोतकर कोणाला पाठिंबा देणार-

अर्जुन खोतकर यांनी काही दिवसांपूर्वी मी आयुष्यभर शिवसेनेतच राहणार असल्याचे सांगितले होते. शिवसेना पक्षप्रमुख उद्धव ठाकरे यांनीही उपनेतेपदाची जबाबदारी खोतकर यांच्यावर सोपवली होती. मात्र खोतकर यांनी थेट दिल्ली गाठून मुख्यमंत्र्यांची भेट घेतली. अर्जुन खोतकर आणि रावसाहेब दानवे यांच्यात एकनाथ शिंदे यांनी समझोता केल्याचे मानले जात आहे. दोन्ही नेते जालन्यातील रहिवासी असून २०१९ मध्ये त्यांच्यात मोठा वाद निर्माण झाला होता. त्यावेळी उद्धव ठाकरे यांनी मध्यस्थी करून दोन्ही नेत्यांमधील वाद मिटवला होता. मात्र आता एकनाथ शिंदे यांच्या नेतृत्वाखाली आमदार-खासदारांच्या बंडखोरीनंतर अर्जुन खोतकर कोणाला पाठिंबा देणार, अशी चर्चा रंगली आहे.

रावसाहेब दानवे यांच्या विरोधातील संघर्षाचे काय होणार-

भाजपमध्ये दाखल झालेल्या शिंदे यांना पाठिंबा द्यावा लागला तर रावसाहेब दानवे यांच्या विरोधातील संघर्षाचे काय होणार, असा प्रश्न खोतकरांसमोर निर्माण झाला. आता एकनाथ शिंदे यांनी दोन्ही नेत्यांना एकत्र येण्यासाठी मनधरणी केल्याचे वृत्त आहे. अर्जुन खोतकरही काही दिवसांपासून ईडीच्या निशाण्यावर आहेत. अशा स्थितीत तपास टाळण्यासाठी ते उद्धव ठाकरेंना सोडून एकनाथ शिंदे गटासोबत जाण्याचा निर्णय घेऊ शकतात, असे मानले जात आहे. खुद्द अर्जुन खोतकर यांनी अद्याप कोणतेही अधिकृत वक्तव्य दिलेले नसले तरी ते दिल्लीत जाऊन मुख्यमंत्र्यांची भेट घेऊन काहीतरी मोठा विचार करत असल्याचे सांगितले आहे.

महत्वाच्या बातम्या :

• Abdul Sattar । तीन तारखेच्या आत गॅरींटीने सांगतो मंत्रीमंडळाचा विस्तार होईल – अब्दुल सत्तार
• Eknath Shinde : माध्यमांना हुलकावणी देत मुख्यमंत्री दिल्ली दौऱ्यावर?; रात्री साडेतीन वाजता परतले पुन्हा मुंबईत
• Ajit Pawar : आमच्या सरकारमध्ये पाच नाही, सातजण होते; अजित पवारांनी घेतला फडणवीसांच्या टीकेचा समाचार
• Cabinet expansion | राज्यातील नेत्यांची दिल्ली वारी सुरूच; महाजन, सत्तार घेणार अमित शहांची भेट
• Eknath Shinde : आदित्य ठाकरे आणि संजय राऊतांनंतर आता एकनाथ शिंदे नाशिक दौऱ्यावर